IBucs yenziwe isitebhisi yiGalaxy ebalekela izembe
I-TS GALAXY isebenzise i-Orlando Pirates njengesitebhisi sokubalekela ukugencwa yizembe ekupheleni kwesizini ngesikhathi iyiqumba phansi ngoMsombuluko ntambama, emdlalweni weDStv Premiership, obuseMbombela Stadium, eMbombela.
ULefa Hlongwane uyena oshayele iGalaxy igoli eshovele ngalo ezansi kwilog, iSwallows FC neMaritzburg United.
Nakuba iPirates yenza kahle kwiCaf Confederation Cup lapho esizibekisele khona indawo kowandulela owamanqamu, kwiligi akuhambi ngendlela abaqeqeshi ababambile, uMandla Ncikazi noFadlu Davids, abafisa ngayo.
Ukugqoza kwamagoli kwiPirates yikhona okuyenza ibukeke isele kwiRoyal AM esendaweni yesibili kodwa futhi (kuyenza ibukeke) ingakhululekile kwazise amaqembu aphefumulela emhlane kuyona ahlanganisa iKaizer Chiefs neStellenbosch FC abheke okufanayo ngesizini. Yingakho lo mdlalo ubumqoka kulaba baqeqeshi abenze izinguquko esikimnini ezibambane neBaroka FC neChippa United ngo-0-0 emidlalweni emibili edlule.
Iqale kahle iPirates idlala ibhola elihle njengenjwayelo kodwa kuthe kusajatshulelwa lokhu, kwaba iGalaxy elishaya kuqala igoli okube ilona lodwa emdlalweni. Ngemuva kweminyakazo yePirates, emapalini eGalaxy, uLindokuhle Mbatha uthole ibhola ngemuva kwephutha likaHappy Jele, waligobela uHlongwane olinamathisele enethini engamakwe muntu ngomzuzu ka-34.
Kubukeke sengathi kuyikhuphulela ukuzethemba lokhu iGalaxy yize ibilokhu iphazanyiswa ukulimala kukanozinti wayo uMelusi Buthelezi.
IPirates izame njalo kodwa ingeyona ingozi umdlalo waze waya ekhefini kugqame ukwehlelwa ifomu okuyisimanga kukaDeon Hotto.
Ukubuya ngomfutho kwePirates ebisifake uKwame Peprah noFortune
Makaringe, ezindaweni zoLinda Mntambo noJele, bekuvulela iGalaxy amathuba uma ihlasela ngejubane.
Ngaphandle kwejubane, iGalaxy iyona ebilihlanganisa kamnandi kubhoke uHlongwane noMbatha phakathi nenkundla.
Kwenzeka lokhu nje, uPeprah uphakele uThembinkosi Lorch ithuba lokulinganisa ngomzuzu ka-58 kodwa wahluleka. Nakuba isikhathi besihamba kodwa iPirates ibikhombisa izimpawu zokusondela ekutholeni igoli, yize ingozi yegoli lesibili leGalaxy ibilokhu ikhona.
Iqiniso lapha ukuthi iyathusa indlela iPirates eyeka amathuba alula ngayo okuyinto ephinde yahlala obala kulo mdlalo, ikakhulukazi esiwombeni sesiibli. ULorch, Peprah, Makaringe noZakhele Lepasa bathole amathuba obekufanele bawasebenzise esiwombeni sesibili kodwa abahlula. Umdlalo ugcine uphele kanjalo.