Ingcindezi kwabeChiefs asebedlalela izinkontileka ezintsha
BANENGCINDEZI yokudlalela izinkontileka ezintsha abadlali beKaizer Chiefs okuvela ukuthi izochitha inqwaba ekupheleni kwesizini.
Sekuqinisekisiwe ukuthi Amakhosi azophinda aqede enye isizini elambatha.
Injabulo eNaturena selokhu yagcina ngesizini ka-2014/2015, kubhiyozelwa ukuwina iligi.
Ukuqhubeka kweminyaka yosizi, kuthiwa sekuphoqe abaphathi ukuthi benze izinguquko ezinqala. Emasontweni amabili edlule, iChiefs ixoshe obengumqeqeshi, uStuart Baxter, ngakho belu ukuphikwa yimiphumela.
Usizi lusaqhubeka eNaturena njengoba amabamba, u-Arthur Zwane noDillon Sheppard, sebehlulwe imidlalo emithathu kulandelana, okuhlanganisa nowangempelasonto edlule, lapho behlulwe yiCape Town
City. Lo mphumela ubulandelwa ukushaywa yiLamontville Golden Arrows, Stellenbosch neSuperSport United, okube ngowokugcina kaBaxter.
Ngokomthombo weSolezwe ozazi zonke ezeChiefs, baningi abadlali abazokhonjwa indlela uma kuphela isizini, iningi labo liphelelwa yizinkontileka ngoJuni.
Kulabo abaphelelwa yizinkontileka kukhona uDaniel Cardoso, Ramahlwe Mphahlele, Leonardo Castro, Samir Nurkovic, Dumisani Zuma, Bernand Parker, Karyn Baccus, Daniel Akpeyi, Erick Mathoho, nabanye. NgoJanuwari ngesikhathi kuvulwe iwindi, iChiefs ivuselele izinkontileka zabadlali abasebancane, azimisa izingxoxo zokuvuselela “ezamakhehla”.
UZwane ekhuluma nabezindaba ngemuva komdlalo weCity, uvule isifuba wathi yize bekhona abadlali eqenjini kodwa kukhona abangekho ezingeni lokudlalela Amakhosi.
"Uma ubheka abadlali esinabo, bahle kodwa abanye babo abekho ezingeni lokudlalela iKaizer Chiefs. Sinabadlali asebehlale eqenjini iminyaka eminingi, eyisithupha kuya kweyisikhombisa, futhi izinto bezilokhu zingasihambeli kahle.
“Lokho kungitshela ukuthi kuzoba noshintsho. Ekugcineni yibhola leli, sisebhizinisini lebhola lapho esidinga khona imiphumela. Sizobona ukuthi ngobani esibalethayo ukuzoqinisa iqembu nesizobakhulula. Kodwa ngendlela okwenzeka ngayo lapha eqenjini, asikwazi ukuqhubeka sithi sinabadlali abasezingeni eliphezulu ekubeni singawini," kusho uZwane.
"Uma sikhuluma ngezinga eliphezulu kufanele ngabe siyawina, sibanga izindebe. Uma singasondele kulokho, ngabe nginamanga uma ngingathi abadlali bazokulungisa lokho. Yebo, abanye bazolungisa kodwa abanye ngeke.
“Isikhathi soshintsho sesisondele futhi ngicabanga ukuthi simanje. Kufanele sakhe kabusha. Kufanele sithungathe abadlali abasezingeni lokudlalela leli qembu ukuze sizobuyela ezingeni lethu futhi sizodlala ngokungesabi."
UZwane ukhale nangendlela abangenelwa ngayo ngamagoli.
"Uma ubheka amagoli asingenelayo kule minyaka emine, ayafana. Mhlawumbe kungenxa yomdlali oyedwa. Ebholeni asifuni ukuphuma iqhubu nabadlali, siyabavikela ngaso sonke isikhathi. Bengingumdlali nami, ngenze amaphutha amaningi. Uyazama ukubavikela labo badlali. Kodwa kukhona lapho ubona khona ukuthi isimo ngeke sishintshe.
“Indlela esingenelwa ngayo ngamagoli iyakutshela, kusukela kuqale isizini, ukuthi siyiqembu sidinga ushintsho futhi lolu shintsho lungasibeka kwelinye izinga ngoba luzobavusa emaqandeni abanye abadlali," kusho uZwane.
Namuhla iChiefs izokwamukela iMarumo Gallants emdlalweni weligi eFNB Stadium ngo-7.30 ebusuku.
Umdlali ozobe engekho uZuma njengoba esephinde wamiswa eqenjini. Izolo, iChiefs ikhiphe isitatimende ithi lo mdlali umisiwe ngenxa yokungaziphathi. UZuma nguyena oshaye igoli lokubika bedlala neCity. Ubethola ithuba lokudlala ngaphansi kukaZwane njengoba ubengabonakali isikhathi eside kwazise useke wamiswa phambilini. Iqembu lamumisa, wayiswa ezindaweni ezihlumelelisa isimilo ngemuva kokuboshwa ngecala lokushayela ephuzile.