INedbank Cup isiwumthobanhliziyo kwiDowns
UMDLALI weMamelodi Sundowns, u-Aubrey Modiba, ubona kuyinto ebidingeka ukuzibekisela kwabo indawo kowamanqamu weNedbank Cup kulandela ukukhishwa, yiPetro de Luanda yase-Angola kumaquarterfinal yeCaf Champions League.
Ukuphuma kweSundowns kwiChampions League kunyakazise izwekazi lonkana kwazise ibingelinye lamaqembu abethishwe ukukhala emuke nesicoco njengoba ibisiyishaye kabili (kweyamaqoqo), i-Al
Ahly yase-Egypt evikela isicoco futhi ingayazi induku esigabeni samaqoqo.
Kudingeke ukuthi iSundowns isukume ngemuva kwalokho kuphoxeka kweChampions League. Iqale ngokuqinisekisa ukuthi iyasivikela isicoco seDStv Premiership ibambana neCape Town City, maphakathi nesonto eledlule. Ngempelasonto, iqhubekile nokukhombisa ukukhonya kwiPremier Soccer League izibekisela indawo kowamanqamu iguzisa iRoyal AM ngo-2-1 kowandulela owamanqamu obungoMgqibelo, eChatsworth Stadium.
UModiba ushayele iSundowns igoli lokuqala kulo mdlalo.
UPavol Safranko ushaye elokuwina ngemuva kwephutha elibi likaHugo Nyame obevimbele iThwihli Thwahla. ISundowns izogadulisa kowamanqamu neMarumo Gallants ngoMeyi
30. IMarumo ihlule iTshakhuma kowandulela owamanqamu.
“Okusijabulisa kunakho konke ukuthi sidlulele kowamanqamu ngoba bekuwumdlalo onzima uma uqhathanisa nesiyijwayele,” kusho uModiba ethimbeni labezindaba leSundowns.
“Besikuhlelele ukuthi uma umdalo udlula esikhathini esejwayelekile, abadlali abaqale ngaphandle kube yibona abenza ushintsho njengoba kwenzekile,” kuqhuba uModiba.
Lo mdlali ube esephawula ngokuphoxeka ngokukhishwa kwi-quarter final yeChampions League.“Bekusemqoka ukuzifaka kowamanqamu weNedbank ngoba siphoxekile ngokuphuma kwiChampions League.
“Bekuyisifiso sethu ukuhamba lonke ibanga kwiChampions League kodwa kwangenzeka. Iligi (esesiyinqobile) neNedbank iyona imiqhudelwano ebese isisalele ukuthi sisule ngayo izinyembezi.
“Sikowamanqamu manje ngakho-ke okufanele kusibuse emiqondweni yethu, ubumqoka bokuvala isizini ngenothi eliphezulu.
“Lokhu akusho ukuthi sesinake iNedbank kodwa nale midlalo emine esisalele kwiligi, kufanele siye kuyona ngokuzinikela ukuze nesizini ezayo isifice sihamba ngomgqigqo wokuwina,” kusho uModiba obe ngumdlali ovelele koweRoyal AM.
Ompetha beligi okwehlandla lesihlanu kulandelana, bazovakashela iSekhukhune United koweDStv Premiership namuhla ngo-5.30 ntambama, e-Ellis Park, eGoli.
Omunye wabaqeqeshi beSundowns, uManqoba Mngqithi, uthe: “Abadlali bayazi ukuthi sinezethu izibalo esifisa ukufika kuzona ngakho-ke imidlalo esele imqoka yize singeke sisafika ku-71 (wamaphuzu), okuyisibalo ebesibheke ukusifica kodwa u-67 wangesizini edlule, usengenzeka.