ISundowns Ladies ibuye ngembudlu yamagoli kwiSuper League

BANYUKELE esicongweni kwi-log yeHollywoodbets Super League ompetha, iMamelodi Sundowns Ladies, ngokubhudluza iGolden Ladies ngo11-0 eTUT Stadium ngempelasonto.

U-Andisiwe Mgcoyi nguyena obeyiphela endlebeni eqenjini laseNorth West njengoba ehlohle amagoli amane kulo mdlalo, wazibeka phambili emjahweni wokuba ngumshayimagoli ovelele.

UMiche Minnies ube ngomunye wabadlali asebeshaye amagoli amathathu emidlalweni emibili yokuvula ngokuvalela amagoli amabili kulo mdlalo. Washaya igoli elilodwa behlula iMa-Indies ngo-2-1 emdlalweni wokuvula isizini.

Lo mdlali, ojoyine amaSandawana esuka kwiVasco da Gama ngaphambi kokuqala kwesizini, uthi usezinze kahle kuleli qembu futhi okwenzeke enkundleni yikona abebekwenza ngesikhathi bezilolonga.

“Ngijabule kakhulu ngoba bekunzima kodwa umoya siwubeke phansi ngoba besisebenze kanzima ngesikhathi silungiselela umdlalo. Kube lula kimina ngoba bengisebenzisa ijubane lami ukuze ngizibeke endaweni enhle yokushaya amagoli,” kusho uMinnies.

"Kuyajabulisa impela ukudlalela ompetha, yiqembu elisezingeni elimangalisayo leli. Njengomgadli kubalulekile ukubhakuzisa inethi nokuzibeka ezindaweni ezinhle enkundleni ukuze uvulele abanye ozakwethu amathuba.“

I-JVW yehlele endaweni yesibili kwi-log kodwa isabambene ngamaphuzu ayisithupha neSundowns.

Iguqise iMa-Indies ngo-2-0 eGiyani Stadium ngoMgqibelo ngamagoli amabili ashaywe wuKgadi Mahlaola.

Umdlali wasemuva weJVW, uJanine Van Wyk, uthe ukuthola amaphuzu amathathu kulo mdlalo kusho lukhulu ngenxa yobunzima ababhekane nabo ngaphambi kokuthi bangene enkundleni.

“Besihlele ukuthi sihambe ngoLwesihlanu ukuze sifike kusenesikhathi esanele kodwa uhambo obekufanele luthathe amahora amathathu lugcine luthathe ayisikhombisa ngenxa yokubambezeleka obekungalindelekile.

"Iqembu lonke belazi ukuthi lizobhekana nomqansa kule mizuzu engu-90 ngenxa yokukhathala kwemizimba nemiqondo. Besizokuthokozela ukuhamba nephuzu kodwa senze kahle kakhulu sawunqoba umdlalo," kusho uVan Wyk.

Amanye amaqembu angakawalahli amaphuzu emidlalweni emibili kule sizini yi-University of Johannesburg

(UJ) neThunderbirds Ladies.

I-UJ idle iVasco da Gama ngo-3-1, iThunderbirds yadlula kwiDurban Ladies ngo-1-0.

I-University of Western

Cape neBloemfontein Celtic bathole iphuzu iqembu ngalinye ngesikhathi bebambana ngo-0-0 e-UWC Stadium.

ITshwane University of Technology idlale umdlalo wayo wokuqala kule sizini yavula ngewini ithela phansi abanye omakoti beSuper League, iCity

Lads Ladies, ngo-7-3 eTUT Sports Stadium.

Amaqembu asayibambe emsileni yiGolden Ladies kanye neTsunami Queens, abasagingqa iqanda ngemuva kokuhlulwa kuyona yomibili imidlalo asebeyidlalile. Kulokhu iTsunami Queens ibhuquziswe yiCoal City Wizards ngo-3-1.