Oxoshwe wuKhozi uchaza ngezinsolo zokuqola
LIGCWALE umoya ibhantshi kumsakazi woKhozi FM uSbu Buthelezi ngemuva kokumiselwa izinsolo ezibucayi.
USbu obethula uhlelo ngo-9 kuya ku-12 emini ngeSonto bese kunesikhathi emisiwe uhlelo lubanjwe nguThembeka Zondo-Cele.
USbu ukhulume udaba lwenkampani yakhe izolo ebusuku kwiFacebook wathi ekugqabukeni kwegoda phakathi kwakhe noKhozi, akuzange kube khona ukubambana ngezihluthu.
“Kuye kufike lezo zikhathi ukuthi kuhlukane umshado, kwenzeke lokho-ke nakithi.”
Echaza ngodaba lokuzwakala kwemininingwane yenkampani yakhe oKhozini, uthe abantu abangadideki, bafaka isikhangisi njengazo zonke izinkampani.
Uqhube wathi izinkinga zezinkampani ziqale ngo-2021 ngesikhathi behlelwa yizinkinga ezadalwa wukubhebhetheka kweCovid-19.
“Kwafika umkhuhlane owabulala zonke izinkukhu zethu. Ukufa kwalezo zinkukhu kwenza ukuthi singabi naso isitoko, umsebenzi waqala waqhuga,” kusho uSbu.
Uthe kwaba nzima ngoba babenenqwaba yabantu ababehweba nabo.
“Lokhu kwaholela ekutheni kukhahlamezeke umsebenzi wethu.”
Uthe bayazi ukuthi baningi abahambe baya kwiSABC bayokhala ngale nkampani nathe kuwudaba abaluphenyayo.
Wenze isithembiso sokuthi akuphelile ngenkampani yakhe futhi kuningi abakuhlelayo.
Okhulumela iSABC uNdileka Cola ukuqinisekisile ukuxoshwa kukaSbu. “Lokhu kuza ngemuva kwezinsolo ezithinta amabhizinisi kaButhelezi afake inhlangano ehlazweni. Abaphathi boKhozi fM bafuna ukukuqinisekisa ukuthi isiteshi asinabo ubudlelwano nenkampani kaButhelezi i-Abombuso Investment,” kusho uNdileka.
Uthe uThembeka uzoqhubeka nokubamba uhlelo.
lisanda kubika ukuthi kunophenyo olwenziwa yiSABC olwaholela ekutheni amiswe ngoba kuthinteka negama layo nelesiteshi ezidabeni zikaSbu.
Kuvela ukuthi amakhasimende kaSbu abecasukile abefika azomcuthela emsakazweni efuna imali yawo. Kuthiwa abaqashi bakhe bamcele ukuthi athi ukushenxa akhokhele abantu imali yabo ngaphambi kokubuyela emoyeni.
Kuthiwa uSbu ubekhangisa ibhizinisi lakhe Abombuso Investements emsakazweni Ukhozi FM bese abalaleli beza ngobuningi bezofaka imali. Kuthiwa kunenqwaba ekhala ngokuthi icwilile imali ayitholanga inzuzo njengokwesethembiso.
USbu ujoyine Ukhozi FM ngo-2008 esuka kwiGagasi FM lapho ayethula khona uhlelo lwezenkolo.