Kuphenduke amatafula okhethweni lwamakhosi
KUPHENDUKE amatafula ngesikhathi kukhethwa ubuholi bendlu yomdabu KwaZulu-Natal.
Obesephathe amahlandla amabili njengosihlalo wendlu yobuholi bomdabu KwaZuluNatal, inkosi Phathisizwe Chiliza, akazange alibone elidlalayo ngesikhathi kukhethwa ubuholi obusha.
UChiliza wehlulwe yinkosi Sifiso Shinga engqungqutheleni ebiseThekwini izolo.
UShinga, oqhamuka kwisifunda Ugu, unqobe ukhetho ngamavoti angu-35 kwangu-11.
Inkosi Ngqayizivele Sithole, oqhamuka kwisifunda uThukela, yona ikhethwe njengephini likasihlalo.
Lesi sikhundla besiphethwe nguNdlunkulu waseMatheni, inkosi Thabisile Zulu, engazange ilungenele ukhetho lwayizolo.
Bobabili uChiliza nenkosi uZulu sebezomela iKwaZuluNatal endlini yobuholi bomdabu kuzwelonke.
Usihlalo omusha, inkosi Shinga, uthe bazosebenza ngokubambisana nawo wonke amakhosi kanjalo nohulumeni wakulesi sifundazwe.
"Sicela kube nokubambisana ngoba ayikho into esizoyenza ngaphandle kokwesekwa ngamakhosi. Uhulumeni wethu wesifundazwe sizosebenzisana nawo ukuze kuxazululwe izinkinga ezikhungethe indlu yobuholi bomdabu."
UShinga uthembise ukuthi bazoyeseka iNdlunkulu kaZulu kuzo zonke izinkinga ebhekene nazo.
Njengamanje indlunkulu ihlukene phakathi ngokufanele angene ezihlangwini zeSilo uGoodwill Zwelithini kaBhekuzulu, esikhothame ngonyaka owedlule.
UShinga uthe kubalulekile ukuba amakhosi aseke iNdlunkulu kaZulu ukuze idlule kulobu bunzima ebhekene nabo.
"Amakhosi aqhamuka kwezinye izifundazwe athembele ebukhosini bukaZulu. Ubukhosi bukaZulu yibo obuyisibani ngakho kubalulekile ukuthi sisondele kuzo zonke izinhlelo zasendlunkulu."
ISilo uMisuzulu Sinqobile kaZwelithini sigcine singafikanga engqungqutheleni yayizolo.
UNdunankulu waKwaZuluNatal, uMnuz Sihle Zikalala, uthe bazosebenzisana nobuholi obusha.
“Kuzona zonke izinkinga ezikhona, kuzofanele sibambisane ukuzixazulula. Isisombululo sokuqala kunoma iyiphi inkinga ekhona ukuthi kuxoxiswane. Uma uke wanqaba ukuthi kuxoxiswane, angeke sibe khona isisombululo.”
UZikalala uthe ubuholi bomdabu budlala indima ebalulekile esifundazweni, iKwaZulu-Natal.
“Silindele ukuthi ubuholi obusha busebenzele ukushintsha impilo yemiphakathi obuqhamuka kuyo.”
UZikalala uphinde wanxusa ubuholi obusha ukuba busebenzisane nohulumeni ukulwa nobugebengu, ukuhlukumeza ngokobulili nokubulawa kwawo nezinduna.
Ingqungquthela yayizolo iqhubeke yize kukhona amakhosi asabisa ngokuphonsela inselelo enkantolo ukuhlala kokhetho lwendlu yobuholi bomdabu KwaZulu-Natal.
Amakhosi aqhamuka esiFundeni iKing Cetshwayo aweneme ngokuqhubeka kokhetho.
Abengesiyona ingxenye yokhetho lwayizolo njengoba akhetha ukuduba ukhetho lwesifunda.
UNgqongqoshe wezokuBusa ngokuBambisana kanye neziNdaba zoMdabu KwaZuluNatal, uMnuz Sipho Hlomuka, uthe basazoxoxa namakhosi aqhamuka eKing Cetshwayo.
"Sinalo uhlelo. Ayikho indlu okufanele ingabi nabo ubuholi. Yingakho kufanele sibambisane namakhosi, kube nokuxoxisana khona kuzokhethwa ubuholi."