Kuqokwe ozophenya ukukhishwa kwabe-EFF ePhalamende
IPHALAMENDE seliqoke umphenyi ozimele u-Advocate Elizabeth Baloyi-Mere, ozophenya izinsolo zokuhlukumeza ngokocansi, udlame olubhekiswe kwabesifazane, ukusabisa kanjalo nodlame phakathi kwamalungu ePhalamende e-EFF namalungu ezokuvikela ePhalamende.
Uphenyo lulandela isikhalo samalungu e-EFF ngemuva kokukhishwa ngesidlozana ngesikhathi uMengameli Cyril Ramaphosa ethula isabelo mali sehhovisi lakhe ePhalamende ngoJuni 9 no-10.
Amalungu e-EFF akhishwa ngesidlozana ngazo zombili lezi zinsuku kanjalo nasenkundleni yokuxhumana ePhalamende ngesikhathi elokhu ephazamisa.
Okhulumela iPhalamende, uMnuz Moloto Mothapo, uthe kwaphazamiseka kwangalandelwa imigomo kaSomlomo ngesikhathi kuqhubeka inkulumo mpikiswano yalesi sabelo. Uthe amalungu abe esefaka isikhalo kuNkk
Nosiviwe MapisaNqakula, uSomlomo wePhalamende afuna kuphenywe.
“Amalungu ezokuvikela ePhalamende nawo afaka isikhalo ngodlame olwalubhekiswe kuwona ngamalungu e-EFF. Abika nokuthi ayasatshiswa.”
Uthe umsebenzi ka-Adv Baloyi-Mere, wukuphenya lezi zinsolo bese ebika kuSomlomo ngakutholile nezincomo.
“Unikwe izinsuku ezingu-14 ukwenza lo msebenzi bese eletha umbiko ezinsukwini ezinhlanu emuva kokuphela kophenyo. Unamava kulo mkhakha wezomthetho njengoba eke waba yibamba lejaji eNkantolo eNkulu ePitoli.” Uke waya nasezinkantolo ezehlukene okubalwa eNkulu, eyokuDluliswa kwamacala, eyoMthethosisekelo neyaBasebenzi. Kwenzeka lokhu nje uMengameli we-EFF, uMnuz Julius Malema, wayevezile ukuthi bazophazamisa uRamaphosa uma esevela ePhalamende futhi ngeke besamhlonipha njengomengameli wezwe.