Ziyaqhubeka izivivinyo zezitshudeni eMUT
SIBUYELE kwesejwayelekile isimo eMangosuthu University of Technology (MUT) emuva kombhikisho wezitshudeni ezikhala ngokuthi abanye ozakwabo kabakakhokhelwe yisikhwama iNational Students’ Financial
Aid Scheme nezinye izinto.
Lezi zitshudeni ziqalile ukubhala izivivinyo ngoMsombuluko emuva kokuqiniswa kwezokuphepha onogada abaqeqeshiwe.
UMnuz Bheki Hlophe osophikweni lwezokuxhumana kule nyuvesi, uthe izivivinyo ziyaqhubeka.
Uthe yonke into ibuyele esimeni enyuvesi emuva kombhikisho okushiswe kuwona nempahla yenyuvesi okubalwa nezimoto zenyuvesi.
Ubalelwa kuR2 millon umonakalo odalwe imibhikisho yakamuva yezitshudeni.
Ezinye izinto ezakhalisa izitshudeni ngezokuphepha njengoba zithi aziphephile.
Zikhala nangenkinga yamanzi ehlasele ikakhulu eThekwini emuva kwezikhukhula zangoEphreli ezakhahlameza ingqalasizinda ezindaweni eziningi.
Lesi sikhungo sithe simise izitshudeni ezingu-22 okubalwa namalungu omkhandlu iSRC.
Sithe kusoleka nezinye izitshudeni zakwezinye izikhungo ukuthi beziyingxenye yalesi siteleka.
Isitatimende senyuvesi esikhishelwe izitshudeni siveze nokuthi kunomkhankaso wenye yezinhlangano zezitshudeni edlelana neqembu elithile lezepolitiki, efuna ukudala udweshu uma kukhona ukungavumelani nabaphathi kubhikishwe kuze kucekelwe phansi nempahla ukuze ikwazi ukuzuza ukwesekwa izitshudeni iphinde ibe nedumela ukuze iphathe nezinye izikhungo kulesi sifundazwe.
Abaphathi besikhungo bathe bazoqhubeka baqinise ezokuphepha ukuze kuphephe izitshudeni, abasebenzi kanjalo nempahla yenyuvesi.