Usuqalile umsebenzi wokulungisa isimo e-Eskom
SEBEBUYELILE abasebenzi be-Eskom emsebenzini emuva kokuthi le nkampani yenze isiphakamiso esisha samaholo esizokwethulwa ohlakeni oluxazulula izinkinga zabasebenzi ngoLwesihlanu.
Izolo uMnuz Sikhonathi Mantshantsha, obhekele ezokuxhumana e-Eskom, uthe abasebenzi babuyele kahle emsebenzini futhi azikho izigameko zokubhikisa ezibikiwe.
Uthe manje sekuzoqala umsebenzi wokubuyisela isimo kwesijwayelekile, kusukela ekukhucululeni amalahle akade avimbe umgwaqo nokuxhuma imishini esilungisiwe.
“Abasebenzi baqale ngoLwesibili ebusuku ukubuyela emsebenzini. Imininingwane yesiphakamiso esisha samaholo, izokwaziwa ngoLwesihlanu uma izinyunyana ne-Eskom sebehlangene kwi-central bargaining forum, okuwuhlaka olukhuluma ngamaholo,” kusho uMantshantsha.
Abasebenzi banqume ukungena esitelekeni esingekho emthethweni emuva kokuthi izingxoxo zamaholo zifinyelele kwangqingetshe kanti bavume ukubuyela emsebenzini emuva kokuzwa ukuthi i-Eskom isinesiphakamiso esisha.
UNobhala jikelele weNational
Union of Mineworkers of
South Africa (Num) uMnuz William Mabapa, uthe asikho isivumelwano okuvunyelwene ngaso ngoLwesibili.
Ucele uNgqongqoshe wamaBhizinisi kaHulumeni ukuthi axolise ngokutshela isizwe ukuthi kunesivumelwano esisayiniwe ngesikhathi enesithangami sabezindaba esiphuthumayo.
Amazwi akhe ananelwe wuMnuz Irvin Jim onguNobhala jikelele weNational Union of Metalworkers of South Africa (Numsa) uthe isivumelwano sizokwaziwa uma sesithulwe kwi-bargaining forum.
“Kunemigudu esiyilandelayo. Asikwazi ukuvele simemezele isiphakamiso esenziwe wumqashi emhlanganweni obuseceleni. Kufanele isiphakamiso samaholo simenyezelwe ohlakeni oluxoxa ngamaholo, lubhalwe phansi bese siyotshela abasebenzi ngaso. Sizwe ukuthi bayavuma ngaphambi kokuthi sisayine,” kusho uJim.
Uthe uma sekulandelwe imigudu efanele bazomemezela ukuthi sithini isiphakamiso nokuthi abasebenzi bayasamukela yini noma cha.
Okwamanje i-Eskom isanqamula ugesi ngokwesigaba sesine. Kulindeleke ukuthi yehlise izigaba zokunqamuka kukagesi njengoba abasebenzi sebebuyele emsebenzini.