Kuhlatshwe kwahlikizwa isicelo sabasolwa ngokubulala usomatekisi
ikukhumbule ukuthi bobabili abasolwa kanye nomufi bebesembonini yamatekisi, edume ngokuba nodlame oluhlasimulisa umzimba.
“Ukubanika ibheyili kuzobe kubekwa impilo yabo engcupheni ngoba asazi ukuthi bazophepha kangakanani kulabo abangase babe nezinhloso zokuziphindiselela kubona.
Into ephephile ukuthi bagcinwe ngaphakathi,” kusho uMchunu.
Uphinde wathi nabo abasolwa akwaziwa ukuthi yini embi abangayenza uma bethola ithuba lokuba ngaphandle kwazise banomlando wokulahlwa amacala abucayi.
Uqhube wathi isihluku abasolwa abasisebenzisa saba sibi kakhulu njengoba kuthiwa umufi baqala ukumdubula ngaseToti Beach, ngezibhamu ezinkulu zohlobo lwe-AK47, baze bayomqedelela esuphamakethe, iTake n’ Pay, eManzimtoti. Uthe isihluku abasisebenzisa, bedubula bebulala umufi emini kubuka wonke umuntu, satshengisa ukuthi bayingozi emphakathini.
Uthe abasolwa bakhishwe amaCCTV camera abaveze kahle, baphinde bakhonjwa nangofakazi abambalwa ababaziyo, kwaphinde kwaba nobufakazi bamaselul obubayamanisa necala.
Enanela kokushiwo wuMchunu umshushisi, u-Advocate Dumisani Nxumalo, uthe umsolwa wesibili, uShozi, kubalulekile ukuthi kukhunjulwe ukuthi leli cala asolwa ngalo ulenze ngesikhathi engaphandle ngoshwele.
Uphinde wathi akhumbule ukuthi akukho olutheni angathi ulujahile ngaphandle ngoba ingane yakhe enesifo senhliziyo, akhale ngokuthi uyayinakekela, kukhomba ukuthi inakekelwe kahle ngoba akakaze athole umyalezo wokuthi inenkinga.
Uphinde wathi nenkampani athi ungumnikazi wayo, nayo akukho okungayivimba ukuthi iqhubeke nokusebenza uma engaphakathi ngoba nanoma iyiphi inkampani ezimele iyakwazi ukuqhubeka isebenze ngaphandle kwabaqondisi bayo.
UShozi ubelokhu ekuveze njalo ukuthi unxusa ukuthi inkantolo imnike ibheyili ngoba akukho okumyamanisa necala futhi amabhizinisi akhe amile njengoba yena evalelwe, kanjalo nengane yakhe egulayo uyakholelwa ukuthi iyamdinga ngoba nguye okwazi ukuyinakekela kangcono.