Kukhuthazwa abezolimo baqashe intsha engasebenzi
KUYASIZA kakhulu ukungena ohlelweni lokuba nomuntu ozokubamba ngesandla ukuze wazi umsebenzi wasepulazini.
Lokhu kushiwo uMnuz Siyabonga Mhlongo oqeqeshelwe umsebenzi kwelinye lamapulazi aphethwe yintsha, iNtathakusa Citrus Farm, eseShowe.
UMhlongo uphawule kanje ngesikhathi kwethulwa ngokusemthethweni uhlelo loMnyango wezoLimo KwaZuluNatal, lokukhuthaza ukuthi abanikazi bamapulazi bathathe abantu abasha abafundele lo mkhakha, abangawutholi umsebenzi, babaqeqeshe emapulazini abo ukuze nabo bakwazi ukuzimela ngaleyo ndlela kwehle isibalo sentsha efundile kodwa engasebenzi, i-Unemployment Agricultural Graduate (UAG).
“Ngingathanda ukuthola ipulazi lami engizozisebenzela kulo njengoba senginolwazi lokusebenza epulazini. Lolu wuhlelo olubaluleke kakhulu futhi luyasisiza kakhulu,” kusho uMhlongo.
UMnuz Sibusiso Gumede, ongumnikazi weNtathakusa Citrus Farm, othathe izitshudeni ezimbili eziphothule izifundo zazo ebezingasebenzi, uthe lolu hlelo luwusizo kakhulu nakubanikazi bamapulazi.
“Kuyasiza ngoba intsha ephothule izifundo zayo inomdlandla izimisele ngokusebenza. Sekungunyaka wesibili ngisebenza nabo bakhombisa izimpawu zokuthi ulwazi ebebenalo luthuthukile kunalokho abafika beyikho. Ngifisa sengathi lolu hlelo lunganwetshwa lube yiminyaka emithathu,” kusho uGumede.
UNgqongqoshe wezoLimo nokuThuthukiswa kweziNdawo zaseMakhaya KwaZulu-Natal, uNkk Bongiwe Sithole-Moloi, usenxuse abomkhakha wezolimo ukuthi baqhubeke nokwehlisa izinga lokungasebenzi entsheni eneziqu zezolimo ngokuyithatha ibe yingxenye yalolu hlelo.
“Sonke siyazi ukuthi intsha yethu idonsa kanzima kanjani, izibalo zakamuva zabangasebenzi zikhomba ukuthi kubantu abasha ababili abasezingeni lokusebenza oyedwa akasebenzi.
Uhlelo lomnyango olwaziwa nge-UAG, luyingxenye yemizamo yomnyango yokuxhumanisa izitshudeni eseziphothule izifundo zazo nabaqashi.