Elinye ithuba lokuphawula ngowezikole
SELULIWE isikhathi sokuthi umphakathi uphawule ngomthethosivivinywa wezemfundo, iBasic Education Laws Amendment Bill (BELA), ofaka nesijeziso esinzima kubazali abanqabela izingane ukuthi ziye ezikoleni.
Ukuphawula ngalo mthethosivivinywa kuvalwe ngoJuni 15 nonyaka kodwa iKomiti leMfundo eyisiSekelo ePhalamende laba nomhlangano lapho livumelene khona ngokuthi kuphinde kuvulwe elinye ithuba lokuthi umphakathi uphawule.
USihlalo waleli komiti, uNkk Bongiwe Mbinqo-Gigaba, uthe balule ithuba lokuphawula kuze kube u-Agasti 15, 2022 emuva kokuthola izicelo zokuthi basilule isikhathi. Uthe kube nezimo ezenze abanye ukuthi bangakwazi ukuletha ukuphawula kwabo ngesikhathi.
“Isikhathi sokuvala ukuphawula besimatasa njengoba bekubhalwa nezivivinyo. Siyayijabulela imibono yomphakathi yingakho sisabele ikhwelo lokuthi siphinde sivule elinye ithuba.”
Uthe okunye okuhloswe ngakho kulo mthethosivivinywa wukuthi kube yimpoqo ukuthi uGrade R, izigungu zabazali kumele zichaze ngokusebenza kwezimali ezikoleni, zinika amandla ungqongqoshe kazwelonke.
Okunye wukuthi kumele kuthathelwe izinyathelo ezinqala labo abavimba izingane ukuthi ziye ezikoleni.
Uzonika inhloko yomnyango kuleso sifundazwe amandla okunquma ngezilimi ezimbili zokufunda nokufundisa, kuzonqunywa ngendaba yokudayiswa kotshwala ezikoleni uma kunemicimbi ethile. Okunye kuzocaciswa ngesigwebo okumele sitholwe yilabo abasaqhubeka nokushaya abafundi ekubeni sekuneminyaka induku yavalwa.
Abafuna ukuphawula bangabhalela ikomiti babhekise incwadi yabo kunobhala wekomiti, uMnuz Llewellyn Brown.
Bangathumela ne-email ku: belabill02@parliament.gov.za noma bangathumela neWhatsApp ku: +27 60 550 9848.
Bangaya naku:www.parliament.gov.za/bill.
Ukuphawula kuvalwa ngo-Agasti 15, ngo-4 ntambama.
UNkk Mbinqo-Gigaba uthe bathole ukuphawulwa kwabantu ababalelwa ku-17 000 wathi nalezi ziphakamiso zabo bazozihlanganisa nalezi ezintsha ezizolethwa kusuka izolo kuze kube inyanga ezayo.
Unxuse abafuna ukuphawula ukuthi bangalindi kuze kube usuku lokugcina ukuthi balethe lokhu kuphawula.