Abezokuphepha bafuna ukwengezelwa isabelo ngoR29m
UPHIKO lwezokuphepha kuMasipala waseThekwini lufuna ukwengezelwa isabelo esikhokhelwa abasebenze isikhathi esengeziwe ngoR29 million.
Lesi siphakamiso sethulwe emhlanganweni wesigungu esiphezulu obuhlezi ngoLwesibili.
I-DA, IFP ne-EFF basichithile isiphakamiso kepha saphasa emva kokuthi i-ANC ikwesekile ukuphasiswa kwaso.
Lolu phiko lufaka phakathi abaqapha izikhulu zikamasipala, ithimba elilwa nokudliwa komhlaba kamasipala nethimba eliyisipesheli eligada ihholo ledolobha.
Ngokombiko osayinwe yiMeya yoMkhandlu, uMnuz Mxolisi Kaunda, futhi ongusihlalo wekomiti elibhekele ukusebenza kophiko lwezokuphepha kumasipala, uphiko belukade lwabelwe uR41 million ekuqaleni konyakamali u-2021/2022 ukuba lukhokhele abasebenza isikhathi esengeziwe.
Umbiko uveza ukuthi ngoMashi nonyaka uphiko bese luvele lusebenzise uR51 million ukukhokhela abasebenze isikhathi esengeziwe.
Umbiko uqhuba uthi uphiko lubona ukuthi kuyokuthi kuphela lo nyakamali lube selusebenzise uR71 million.
Unyakamali womasipala uphela ekupheleni kwale nyanga.
“Sicela imvume yokuba kwengezwe isabelo sophiko lwezokuphepha esikhokhelwa abasebenze isikhathi esengeziwe.
Ulwazi esilutholayo wukuthi isabelo esikhokhelwa abasebenze isikhathi esengeziwe ophikweni lwezokuphepha, asizange sengezwe ngesikhathi kuhlelwa kabusha isabelomali somkhandlu ngenxa yokuthi akekho owaveza ukuthi sidinga ukwengezwa.
“Njengamanje ikhombisa ukulokhu ikhule njalo imali ekhokhelwa abasebenzi abasebenze isikhathi esengeziwe, nokuphoqa ukuthi uphiko lugcine selusebenzisa imali olungagunyaziwe ukuyisebenzisa,” kusho umbiko.
Lolu phiko luthe ukungabi khona kwabasebenzi abenele kanye nohlobo lomsebenzi oluwenzayo ikhona okwenze ukuthi kube nesidingo sokuthi kube nabasebenza isikhathi esengeziwe esiningi.
Umbiko uphethe ngokuthi loluphiko luphezu kwezinhlelo zokunciphisa imali ekhokhelwa abasebenze isikhathi esengeziwe.
“Kunohlelo olusha olusetshenziswayo. Ukungabi khona kwabasebenzi abenele yikhona okuphazamisa izinhlelo zophiko zokunciphisa imali ekhokhelwa abasebenze isikhathi esengeziwe.”
Amakhansela eDA, IFP kanye ne-EFF akubeke kwacaca ukuthi awahambisani nesiphakamiso kepha awe-ANC avote ngobuningi bawo.
Lolu akusilo uphiko lokuqala kumasipala ukucela ukwengezelwa ngezigidi zamaRandi imali ekhokhelwa abasebenze isikhathi esengeziwe.
Uphiko lwamaphoyisa kamasipala lusanda kucela ukungezelwa ngoR60 million isabelo salo esikhokhelwa abasebenza isikhathi esengeziwe.