I-AgriSA ikhathazekile ngokuvalwa kwefemu
yabalimi, i-AgriSA, ikhathazekile ngezinhlelo zokuvala ifemu eyenza izithelo ezisemathinini ese-Ashton, i-Ashton Canning Co Pty Limited, eWestern Cape.
Esitatimendeni esithunyelwe kwabezindaba, i-AgriSA iveze ukuthi ukuvalwa kwale femu kuyajabhisa ngoba abalimi basanda kusayina isivumelwano esibizwa nge-Agriculture and AgroProcessing Masterplan.
“Ukuvalwa kwefemu yase-Ashton kuzoholela ekudilizweni kwabasebenzi abawu-4 500. Abalimi nomphakathi wale ndawo bazothwala kanzima ngoba ibisiza kakhulu ekuvuseleleni umnotho wezwe.
“Siyacela uhulumeni angenelele akhulume nabeTiger Brands ukuthi baziyeke izinhlelo zokuvala le femu,” kusho uMnuz Jacques Jordaan oyisikhulu esiphezulu seCanning Fruit Pruducers Association.
Uthe ngesikhathi iTiger Brands imemezela izinhlelo zayo zokuvala le femu, kwaba nabatshalimali abafisa ukuyithenga baveza ukuthi bazodinga imali ephakathi kukaR200 million noR300 million ukuze bakwazi ukuyithenga.
“Njengamanje iTiger Brands ifuna abazothenga le nkampani babe nale mali kungakapheli izinsuku eziwu-60. Kuzobanzima ukuhlanganisa imali engaka ngaphandle kokwesekwa wuhulumeni, siyacela angenelele,” kusho uJordaan.
Uthe bangaphezu kuka-300 abalimi abatshala izithelo ezifakwa emathinini ale femu okusho ukuthi uma ivalwa, ngeke babe nemakethe yokudayisa umkhiqizo wabo.
Uthe izithelo ezisemathini ezenziwa kule femu eyasungulwa eminyakeni ewu-70 edlule, ngezakwa-KOO ezidayiswa kuleli nezinye ezifakwa emathinini abhalwe Silverleaf noGoldReef, ezidayiswa kwamanye amazwe.
Uphethe ngokucela iTiger Brands nohulumeni ukuba baxoxe nezinhlaka ezithintekayo ukuze kutholakale isisombululo esizoholela ekutheni ifemu ihlale ivuliwe.