IMambazo izohlonipha uMandela noMshengu ngomcimbi
IZINGWAZI zomculo wesicathamiya, iLadysmith Black Mambazo, zizokhumbula umsunguli weqembu nowaba ngumengameli wokuqala wentando yeningi eNingizimu Afrika.
Omunye wabaholi baMambazo amnyama, uSibongiseni Shabalala, uthe bazohlonipha uSolwazi Joseph Shabalala noMnuz Nelson Mandela ekhonsathini ezoba seThe Jo’burg Theatre, eBraamfontein, ngoJulayi 17.
Uthe okwenze babona kufanele bakhumbule uMandela ngenyanga azalwa ngayo, wukuthi wayengumlandeli omkhulu waMambazo.
"Wathi ngesikhathi eseRobben Island, iLadysmith Black Mambazo, yayibaduduza futhi ibanikeza ithemba lokuthi ngelinye ilanga iNingizimu Afrika iyokhululeka.
“Umengameli wayimema iLadysmith Black Mambazo ukuba imphelezele ngesikhathi eyokwamukela umklomelo weNobel Peace Prize e-Oslo, eNorway.
“Emuva kwaleyo ngqophamlando yomcimbi, uJoseph Shabalala neLadysmith Black Mambazo, babhala ingoma ngenhloso yokuhlonipha uMadiba ngokwamukela umklomelo weNobel Peace Prize nokuba wuphawu loxolo nokuthula emhlabeni jikelele."
USibongiseni uthe ingoma ethi Long Walk To Freedom bayenzela ukuhlonipha uMandela ngokuba wumengameli wokuqala wakuleli owakhethwa ngentando yabantu.
Omunye wezingqalabutho zaMambazo, u-Albert Mazibuko, uthe ngomcimbi wabo bazobuye bagubhe ukuqeda iminyaka ewu-62, iqembu liyibambile insimbi ishisa emculweni.
"Ikhonsathi iCelebrate
Nelson Mandela, iwumgubho yalokho uMandela ayekumele. Ngakho ihlose ukusabalalisa umyalezo wothando noxolo emhlabeni jikelele.
“Lo mcimbi uhlose ukukhuthaza abantu ukuba bayeke udlame uma kunokungavumelani kodwa basebenzise uxolo."
Esephetha, uMazibuko uthe umcimbi uzokuba minyaka yonke futhi uzosabalala nezwe lonke.