Sekudingeka omunye umthombo wezamandla ukulekelela i-Eskom ehlulekayo
INKINGA yokuhluleka ukuvimba ukunqanyulwa kukagesi kwe-Eskom, kuzowuqumba phansi umnotho waseNingizimu Afrika. Ezinkingeni eziningi izwe elibhekene nazo, akumele engabe kuzo kubalwa nokushoda kwamandla kagesi.
Kumele engabe ugesi sithembele kuwo ukugcina amabhizinisi nezikhungo kusebenza ukuze kusimamise umnotho wezwe okusenzima ukuwufukula selokhu kwagadla iCovid-19.
NgoLwesibili, isikhulu esiphezulu sase-Eskom, u-Andrew de Ruyter, siveze ukuthi isiteleka sabasebenzi bale nkampani sizoba nomthelela omubi ekulondolozweni kwamandla kagesi.
Lokhu kutshengisa ngokusobala ukuthi izinto kazihlelekile kule nkampani.
Kusobala ukuthi i-Eskom kayinalo uhlelo lokusebenza ngaphansi kwezimo eziphuthumayo. Lokhu kubangelwa wukungaphathwa ngendlela kwenkampani, inkohlakalo nokukhwabanisa.
Abasebenzi base-Eskom, njengabo bonke abasebenzi bakuleli, ngokuvunyelwa wuMthetho wezabaSebenzi, banalo ilungelo lokukhala ngamaholo nokuteleka nxa kungavunyelwana nomqashi. Lokhu kodwa akusho ukuthi kumele ugesi ungabi bikho, akumele engabe le nkampani ikhuluma indaba yokucishwa kukagesi kusuka esigabeni sesithupha ngoba kumele engabe izikhulu zayo zinalo uhlelo olumile lokumelana nezimo ezikanjena.
Sekukhulunywe kakhulu ngokwehluleka kwezikhulu zale nkampani ukuvimba ukunqanyulwa kukagesi kodwa kungenziwa lutho. Zikhona futhi nezinsolo zokuthi izinto kazilungi nje, yingenxa yokugxambukela kosopolitiki abasebenzisa le nkampani ukufeza izinhloso zabo. Kukona konke okwenzekayo kabacatshangelwa abantu baseNingizimu Afrika, abaphila kabuhlungu ngenxa yokungabi bikho kukagesi.