Uvule ibhizinisi lezithako zokudla engaqondile
UKUDLA ungakuthaka ngezitshalo kuphela kube mnandi futhi kukuvikele ekutheni ugcine ungenwa yizifo njengoba kwenze owesifazane obethi uyazihlanganisela ama-herb wagcina esenomkhiqizo omningi.
UNkk Linda Mkhwanazi (28) odabuka ePitoli kepha osezinze e-East London ngenxa yomsebenzi, uthe ukudla okuthakwe ngezitshalo (ama-herb) kuba mnandi futhi awubi nalo uvalo ngokunambitheka kwakho.
UNkk Mkhwanazi ongumsunguli wenkampani eyenza izithako ezenziwe ngama-herbs atshalwe ngomquba kuphela, iThe Planted Lifestyle, uneziqu zokunakekela impilo yemfuyo, i-Animal Health.
Uzithole esenothando lokutshala ama-herb, awomise awahlanganise enze izithako (spices).
Uthe ufuna ukukhuthaza abantu ukuthi basebenzise izitshalo ezingafakiwe amakhemikhali, bagweme nokusebenzisa amasobho anezithako eziyingozi emzimbeni.
Le ntokazi ithe ayikukhonzile ukusebenzisa amasobho uma ipheka ngoba ikholelwa ukuthi kunezinto eziningi eziyizinongo ezifakiwe kuwo ezingaholela ekutheni umuntu owasebenzisayo, ngokuhamba kwesikhathi, agule.
"Lokho akusho ukuthi ngithanda ukudla okubi, ngiyakuthanda ukudla okumnandi kodwa mina ngisebenzisa izitshalo uma ngipheka. Kuma-herb ami kukhona ajwayelekile njengethyme, basil, rosemary, pasley, mint, cumin namanye.
“Amanye ngiwasebenzisa enjengoba enjalo ephuma engadini kuthi amanye ngiwomise, ngiwagaye abe yimpuphu, ngiwahlanganise namanye bese kuphuma isithako esimnandi," usho kanje.
Uthe utshala no-garlic, anyanisi, tumeric, cinnamon, nakho uyakomisa akugaye bese ekudayisa sekuyimpuphu.
Uqhube wathi ungene kuleli bhizinisi engaqondile ngoba ubefuna ukuthi kube nento achitha ngayo isizungu njengoba esakhulisa ingane yakhe, engakafuni ukusebenza.
"Phambilini, bengiwathenga ama-herb kodwa njengoba sengihlala emakhaya e-East London, ngibe nombono wokuthi ngitshale ukuze ezinye izinto ngingazithengi.
“Ngitshale kakhulu kwadingeka ukuthi ngibe nesu lokuthi ngizowenzanjani lo mkhiqizo omniningi kangaka ngoba bengingafuni ukuwulahla.
“Ngiwumuntu othandayo ukufunda kwiYouTube, ngingene khona ngafunda ukuthi ngingawagcina kanjani ama-herb amaningi. Ngigcine sengifunda nokuthi ngingawashintsha kanjani abe ngomunye umkhiqizo okungukuthi ngiwagaye abe yimpuphu nokuwathaka akhiphe i-spice," kusho yena.
Uthe uqale wakhangisa umsebenzi wakhe ezinkundleni zezokuxhumana efuna ukubona ukuthi uzothengwa yini.
"Bengifaka umkhiqizo wami emapulastikini nasemaphepheni angenalo igama. Kuthe uma sengithola ama-oda aseGauteng naseCape Town, ngabona ukuthi kumele ngishintshe, ngenze into ebukekayo.
“Umkhiqizo wami ngiwufake ezitsheni ezinhle ukuze wehluke. Njengamanje, eminye yemikhiqizo yami sengiyifaka nasemabhodleleni. Sengibone nokuthi kuyaphileka ngaleli bhizinisi, angisaboni nokuthi ngizobuye ngiwubheke umsebenzi.
“Ulwazi lwami ngizolusebenzisela ukuthi ngifuye mina, hhayi ukuqashwa. Ngangihlele ukuthi ngizosebenza iminyaka engu-10 kulo mkhakha bese ngiyayeka kodwa manje sengishintshile.
“Kuningi okushintshile ngami, angisafuni nokubuyela edolobheni, kumnandi ukuba semakhaya ngoba kungivulele ithuba lebhizinisi," kusho uNkk Mkhwanazi.