Obenenkinga yesikhumba usezikhiqizela okokugcoba
UKUBA nenkinga yesikhumba esinamabala, esomile kuholele ekutheni azenzele ukhilimu wokugcoba olungele abanesikhumba esifana nesakhe.
UNksz Nomfundo Ndlovu waseHammarsdale uthi ukhule enesikhumba esingenankinga kodwa esekhulile saqala samila izinto ezimhlophe okuthi uma ezisusa kusale amabala.
"Ngigcine senginamabala amabi emzimbeni nasebusweni obekwenza ngingathandi ukugqoka izinto ezingiveza umzimba," kusho yena.
Uthe ubeya kodokotela abajwayelekile kodwa engenayo imali yokuya kudokotela wesikhumba, abuye athenge imikhiqizo kodwa akazange asizakale kunalokho imikhiqizo abeyithenga beyenza ukuthi isikhumba sakhe sibe sibi kakhulu.
Uthe imikhiqizo abejwayele ukuyithenga ibibiza futhi engasizakali okuholele ekutheni agcine esezihlanganisela izinto ezwa abantu bezincoma ukuthi ziyasiza esikhumbeni ezifana nolamula no-castor oil.
"Ngiqala bengizenzela ngendlela engicabanga ngayo ngingenalo ulwazi lokuthi kumele ngikale kanjani, ngesinye isikhathi bekwenzeka ukhilimu uphume kahle, kwesinye ungenzeki. Ngokuhamba ngabona ukuthi ukhona umehluko esikhumbeni sami," kusho yena.
Uthe ngesikhathi esekwazi ukuzenzela owakhe, ubone ukuthi baningi abantu abanenkinga yesikhumba acabanga ukuthi badinga imikhiqizo engenawo amakhemikhali wase ecabanga ukuthi akufundele ukwenza izinto zokugcoba ezithakwe ngezinto ezingenawo amakhemikhali.
"Ngifunde online lapho ngithole khona ulwazi oluyilo olwenze ukuthi ngenze neminye imikhiqizo, ngingagcini ngokhilimu wasebusweni nasemzimbeni," kusho yena.
UNksz Ndlovu usesungule inkampani, iNNG, eyenza imikhiqizo yesikhumba kusetshenziswa izithako ezingenawo amakhemikhali.
Uthe imikhiqizo ayidayisayo isiza isikhumba esinezinduna, esomile nesilinyazwe okhilimu.
Uthe phambilini ubesebenzela ekhaya kodwa amanje usenendawo yebhizinisi esenkabeni yedolobha eThekwini ukuze amakhasimende afisa ukuthenga azifikele.
"Amakhasimende amaningi ngiwathola ezinkundleni zokuxhumana. Abanye bayafika bazothenga kodwa abaningi baye bacele ukuthi ngibaposele imikhiqizo yabo.”