‘Qaphani izingane zingaminzi ’
ININGIZIMU Afrika ikleliswe endaweni ka-35 emazweni okuminza kuwo izingane emhlabeni jikelele. Ucwaningo lwenhlangano esiza ababhekene nezimo eziphuthumayo iCrisisOnCall, luthi izingane ziyaminza ebusika ngoba abazali basuke bengazitsheli ukuthi kunomuntu ozobhukuda.
UMnuz Hendrik Neethling, oyisikhulu esiphezulu seCrisisOnCall, uthe izingane ziyathanda ukuya emanzini, azinandaba nokuthi kusebusika noma kusehlobo.
“Siyacela abazali baqinisekise ukuthi ama-swimming pool amboziwe ikakhulukazi njengoba izikole zivaliwe. Siye sibone zanda izigameko zokuminza kwezingane.
“Kufanele abazali baqaphele ngoba nezinto zokumboza ama-swimming pool ziyadabuka uma izingane zidlala phezu kwazo.
“Lokhu kungenza ingane ithuke bese igwiliza noma ngabe iwajwayele amanzi,” kusho uNeethling.
Uthe akuwona ama-swimming pool kuphela adinga ukumbozwa nokuqashwa ngeso lokhozi kodwa yonke into egcwala amanzi ngoba nakubhavu zingagwiliza uma zisencane.
“Njengoba kuvalwe izikole siyazi kunzima kubazali ukubhekana nomsebenzi nezingane ikakhulukazi kulabo abasebenzela emakhaya. Izigameko zokulimala kwezingane ziyenzeka uma abazali bematasa kakhulu.
“Kubalulekile ukuthi bahlabe ikhefu emsebenzini noma babe nomunye umuntu ozobasiza ukubheka izingane,” kusho uNeethling.
Uthe kufanele ama-swimming pool abiyelwe uma kunezingane angagcini nje ngokumbozwa.
“Ngonyaka ziwu-236 000 izingane eziminzayo emhlabeni jikelele, iNingizimu Afrika ilele endaweni ka-35 ngabashona ngokuminza.
“Sithole ukuthi izingane eziminza kakhulu yilezo ezineminyaka engaphansi kwemihlanu nezineminyaka engaphansi kwengu-14. Siyacela abazali bavale zonke izindawo ezinamanzi angagwilizisa izingane,” kusho uNeethling.
Uthe abazali kufanele bahlale benezinombolo zabezimo eziphuthumayo ngoba kungenzeka noma yini njengoba kuvalwe izikole.