Ziyavuka emlotheni ezokungcebeleka eKZN
USIHLALO webhodi lezokuvakasha KwaZuluNatal, iTourism KZN, uMnuz Sthembiso
Madlala, uthi ukuhoxiswa kokufakwa kwezifonyo nokuthanjiswa kwemigomo yeCovid-19 kubuyisa ithemba kwezokuvasha esifundazweni.
Ukusho lokhu ngesikhathi ehambele umcimbi wokwethulwa kabusha kweBattlefields Festival, obuseLadysmith.
Uthe ezokuvakasha zingenisa u-10% emnothweni wesifundazwe.
“Emva kokushayeka kakhulu kwezindawo zokuvakasha ngenxa yeCovid-19, abantu abaningi balahlekelwa yimisebenzi, kwama nemicimbi nezokuvakasha iminyaka emibili. Nokukhahlanyezwa yizikhukhula kwaba nemiphumela emibi kakhulu kule mboni.
“Sekuyaqala ukukhanya, okwenza sithembe ukuthi sesizoqala sibone izivakashi eziqhamuka ngaphandle kwesifundazwe zingcebeleka ezindaweni zethu.
“Umqondo omuhle ukuthi abantu baphume bazishayise ngomoya ngokungcebeleka ngemuva kokuvaleleka isikhathi eside. Lokho kuyayivula ingqondo,” kuchaza uMadlala.
Uthe kubalulekile ukuthi abantu bazi ukuthi uma bevakasha bafaka isandla ekuthuthukiseni umnotho futhi babamba iqhaza ekwakheni amathuba emisebenzi.
Uveze ukuthi oThukela District sekufike izivakashi eziningi emva kokuthi kuvalwe amabhishi eThekwini.
“Njengoba lesi sifunda silapho odlula khona uma ubheke eThekwini nezivakashi zethu ziqhamuka kakhulu eFree State naseGauteng.
“Njengoba sike saba nezinkinga, okubalwa kuzo izikhukhula, abantu abebethi bayavakasha base bezwa endleleni ukuthi amabhishi avaliwe, bebengabuyeli emuva kodwa bebeza eLadysmith ukuzongcebeleka bahlale kahle,” kuchaza uMadlala.
Uthe unxusa abantu ukuthi bavakashele lezi zindawo ukuze bezothuthukisa ezokuvakasha esifundazweni.
IMeya kaMasipala i-Alfred Duma, uMnuz Zama Sibisi, ithe:
“Ngokuthuthuka komnotho wendawo sifuna ukubona kwakheka amathuba emisebenzi, ukubamba iqhaza kwabadayisi abasathuthuka nokukhulisa ubudlelwano kwezohwebo.
“Sifuna ukubona imibukiso yemisebenzi ozovuleleka ezingeni lamazwe ngamazwe lapho abantu abasha bezokwazi ukwenza imisebenzi etholakala phesheya,” kuchaza uSibisi.