Izogaba ngawaseKZN ifilimu yamatekisi
KUZONIKEZWA amaciko aKwaZulu-Natal ithuba lokulingisa efilimini entsha ezoqoshwa eThekwini egxile empilweni yosomatekisi. ITaxi
yifilimu eqoshwa yiShelembe Production, ithungatha abalingisi abawu18 abazodlala izindawo ezahlukene, okubalwa neziphambili. Inhlolokhono izoba se-48 Sunnyside ePinetown ngoMgqibelo kusukela ngo-9 ekuseni.
UNhlanhla Shelembe ongomunye wabadidiyeli abakhulu bomdlalo, uthe bazothatha abesifazane abane abazoba ngamakhosikazi osomatekisi. Badinga nosomatekisi abane kanjalo nabalingisi abangeziwe abangu-10. UShelembe uthe yize befuna abantu abaneminyaka esukela ku-21 kuya ku-45 kodwa ngeke balishalazele ikhono nakwasebekhulile uma kubonakala ukuthi balingisa ngendlela.
"Inhloso enkulu wukuthuthukisa abantu, bathole isinkwa njengoba kuntuleka namathuba emisebenzi.
Sizogxila kakhulu ekhonweni kunobhekisisa iminyaka yomuntu yize siyibekile," kusho uShelembe.
Eqhuba uthe kuningi okuqukethwe yifilimu ngempilo yosomatekisi okungakaze kuvele kweminye yemidlalo. UShelembe uthe ifilimu izofundisa abantu ngokuhle okwenzeka ematekisini kodwa ngeke ikushiye ngaphandle nobubi obuhambisana nebhizinisi lakhona.
Ephetha uShelembe uthe bakhona nabanye osaziwayo abazoba yingxenye yefilimu kodwa abazomenyezelwa ngokusemthethweni ngesikhathi sekwethulwa ifilimu. Omunye wabantu abazolingisa phambili efilimini nguThemba Dlamini, owaduma emdlaweni wamahlaya iFamily elingisa indawo kaThemba. Ugabigabi wefilimu sewuqoshiwe, kusalindwe ukuthi ukhishwe njengesikhangiso ukuze abantu bayilindele. Ukuqoshwa kwefilimu egcwele, uShelembe uthe kuzoqala ngoMsombuluko njengoba impelasonto beyisebenzisela ukuqasha abalingisi abasashoda.