Awesibhuda abheke ukuketula iNigeria kwi-Awcon
ASETHELEKILE eMorocco amazwe angu-12 aseAfrika, ngaphambi komqhudelwano omkhulukazi ebholeni labesifazane, iTotalEnergies African Women Cup of Nations (Awcon).
Lo mqhudelwano uzoqala ngoMgqibelo, ngo-10.30 ebusuku, lapho osokhaya iMorocco bezodudulana khona neBurkina Faso, ePrince Moulay Abdellah. Uzoqhubeka kuze kube uJulayi
23, eRabat naseCasablanca.
Amaqembu amane azofinyelela kweyandulela owamanqamu azozibekisela indawo kwiNdebe yoMhlaba ezodlalwa ngonyaka ozayo e-Australia naseNew Zealand.
Amanye amabili azophinde athole ithuba lokungena ngokudlala komunye umqhudelwano wokuhlungela namazwe amanye amazwekazi. Lo mqhudelwano owawaziwa ngeAfrican Women’s Championship, waqala ukudlalwa ngo-1991, owesibili waba ngo-1995.
Kusukela ngo-1998, kwanqunywa ukuthi ube njalo ngemuva kweminyaka emibili. Waphazamiseka ngo-2020, ngenxa yobhubhane iCovid-19. INigeria yaba ngompetha ngokuguqisa iCameroon ngo-6-0 ngo-1991, yanqoba ngo-2-0 emlenzeni wokuqala, nango-4-0 kowesibili.
Owamanqamu ka-1995, kwaba ngowokugcina owadlalwa imilenze emibili, kwanqoba iNigeria ibhudluza iNingizimu Afrika ngo-11-2 uma seyihlanganisiwe.
ISuper Falcons izihambela yodwa ngezicoco ezingu-11
(1991, 1995, 1998, 2000, 2002, 2004, 2006, 2010, 2014, 2016, 2018, 2018) kulandele i-Equatorial Guinea ngezimbili (2008 and 2012).
Amaqembu asefinyelele kowamanqamu kaningi kodwa asayizwa ngendaba eyokudla isicoco yiNingizimu Afrika (1995, 2000, 2008, 2012 ne2018), Cameroon (1991, 2004, 2014, 2016) neGhana (1998, 2002, 2006).
Umdlali ogqame kakhulu selokhu waqalwa umqhudelwa
no uPerpetua Nkwocha waseNigeria, owabashaya bonke emakhanda ngokuhlohla amagoli ngo 2002, 2004, 2006 nango-2010.
Indebe ibijwayele ukubangwa ngamaqembu ayisishiyagalombili, adlule kweyokuhlunga kodwa kulokhu kuzogadulisana amaqembu angu12. Kunamazwe amane azokube eqala ukuba yingxenye yawo okuyiBotswana, Burkina Faso, Burundi neTogo.
GROUP A: Morocco, Burkina Faso, Senegal,
Uganda
Iqembu elizobhekwa kakhulu kuleli qoqo yiMorocco esingethe imidlalo. Nakuba i-Atlas Lionesses isadlale kabili kulo mqhudelwano. Kodwa kuningi okuzobe kulindelwe njengoba ngoNovemba ka-2020, yaqasha umqeqeshi waseFrance, uReynald Pedros, owayedle izicoco ezimbili zeligi nezimbili ze-UEFA Champions League ne-Lyon.
Ibophele abadlali asebezakhele amagama njengoSanaa Mssoudy, Ghizlane
Chebbak noSalma Amani.
ISenegal ne-Uganda, abazobe bedlala owesibili kulo mqhudelwano, kubhekwe ukuthi balwele indawo yesibili, bashiye omakoti iBurkina Faso emsileni.
Group B: Cameroon, Zambia, Tunisia, Togo
ICameroon ingelinye lamazwe anamava kulo mqhudelwano esiwudlale izikhawu ezingu-13. Nakuba ingakawunqobi, ihlale ibalwa namaqembu athelwe ngeqoma futhi kubhekwe ukuthi iqhwakele kuleli qoqo.
I-Indomitable Lionesses inabadlali abaningi abayingozi njengo-Ajara Nchout, odlalela i-Inter Milan yase-Italy, noGenevieve Ngo Mbelek noKevin Ossol abangalibheki ipali. IZambia isethubeni elihle njengoba ikhombise ukuthuthuka eminyakeni edlule. ICopper Queens iholwa ngukaputeni uBarbara Banda ojwayele ukubambisana noGrace Chanda phambili.
ITunisia kungenzeka iphendule amatafula njengoba isibophele abadlali abagijima phesheya emazweni afana neFrance neGermany.
GROUP C: Nigeria, South Africa, Burundi, Botswana
Akulula ukuqagela iqembu elizokwenza kahle kuleli qoqo ngenxa yokuthi kuqhathwe ompetha iNigeria nezimbangi zayo iNingizimu Afrika.
ISuper Falcons ijwayele ukuzindizela kulo mqhudelwano kodwa kamuva iBanyana ikwazile ukuyimisa kabi. Ompetha bazobe behlome ngomgadli weBarcelona u-Asisat Oshoala kodwa banenqwaba yabanye abadlali abayingozi njengo-Ifeoma Onumonu no-Vivian Ikechukwu.
Amathemba eNingizimu Afrika azobe esemahlombe ezilomo ezigijima phesheya uThembi Kgatlana oyibamba kwi-Atletico Madrid noRefiloe Jane we-AC Milan. Nakuba iNigeria neBanyana kulindeleke ukuthi baqhwakele kuleli qoqo, kuzomele bayiqaphele iBotswana nayo esiqala ukudlondlobala ebholeni labesifazane.