UZondo uthulela uMato isigqoko ngesinqumo sabaqeqeshi be-Arrows
ILAMONTVILLE Goolden Arrows inembe enxebeni ngokunika ngokugcwele uVusimuzi “Kanu” Vilakazi noMabhuti Khenyeza, umsebenzi wokuqeqesha leli qembu ngesizini ezayo yeDStv Premiership.
Lona umbono woqweqwe lomqeqeshi, uKhabonina Zondo, oqale ukusebenza kuBafana Bes’thende besengabadlali abancane uVikalazi noKhenyeza.
NgoLwesibili i-Arrows ikhiphe isitatimende esifushane ezinkundleni zayo zokuxhumana imemezela ukuthi laba baqeqeshi abakhulele kuleli qembu, yibona abazobe beshayela umkhumbi ngesizini ezayo.
UVilakazi noKhenyeza abakhulele kuyona i-Arrows yibona vele abaqede isizini edlule besebhentshini kulandela ukukhonjwa indlela kukaLehlohonolo Seema ngoMashi.
Emidlalweni yokugcina eyisithupha yeligi bebambile, i-Arrows ishaywe kanye (Baroka FC).
UZondo uthe, isinqumo sikasihlalo we-Arrows, uMato Madlala, sokunika umsebenzi uVilakazi noKhenyeza, siyizinkomba zokuthi uyabuqonda ubumqoka bokugcina isiko laBafana Bes’thende.
“Engikuthanda kakhulu ngeArrows ukuthi ihlale yenza ngendlela ehlukile kunamanye amaqembu ikakhulukazi kubadlali bayo bakudala nangokuzigqaja ngokungagudluki kwisikompilo layo,” kusho uZondo.
“UKhenyeza noVilakazi ngokwahlukana bahlale iminyaka eminingi kwi-Arrows beziphethe kahle futhi benza ngendlela encomekayo nasenkundleni.
“Bobabili bafike bengabafana manje bangabaqeqeshi abakhule kahle ngaphansi kwezinhlaka ezifanele zokuqeqesha.
“Ngiyababongela ngokuthi sebeze bafika kuleli zinga ngoba bobabili bayazi ukusuka nokuhlala i-Arrows,” kuqhuba lo mqeqeshi.
Okumjabulisa kakhulu uZondo ukuthi lesi sinqumo sikhomba ukuthi i-Arrows iyohlale yaziwa ngale ndlela eyaziwa ngayo.
“Bayazi ukuthi sibatholephi sabaphendula abadlali bebhola elikhokhelayo ngakho-ke angingabazi ukuthi nabo bazokwenza okufanayo. Kuhle futhi ngoba kuzothi noma uKhenyeza ephakanyelwa umoya, uVilakazi ungumuntu ophansi.
“Okumnandi kunakho konke ukuthi uhlobo lwabadlali oluzokhiqizwa i-Arrows ngeke lushintshe.”
Ngaphambi kokusonga uZondo utuse uMadlala ngokusika iphethini kumfowabo ongasekho uRocky Madlala.
“USis Mato ungikhumbuza uRocky ongasekho ngokukholelwa kokungokwabo. Abakholelwa ekulandeni abantu abangazi lutho nge-Arrows ngoba lokho kunobungozi bokulishintsha iqembu.
“Lokhu akwenzayo ukuvikela nokugcina isikompilo le-Arrows ngakho-ke ngimethulela isigqoko ngalokho,” kusho uZondo.