ULetsoaka weluleka uTruter ngabadlali 'abahluphayo'
UMQEQESHI uSerame Letsoaka ubona impukane izobuyela kwandawo kubadlali 'abahluphayo' abasayine kuMaZulu FC uma uBrandon Truter, opheka Usuthu, ezohluleka ukuyiqonda indlela abayiyona.
ULetsoaka, onikezwe yiFifa umsebenzi wokucija osomaqhinga kososeshini abangu-15 e-Afrika, sekuneminyaka enyamalele ekuqeqesheni ebholeni laseMzansi.
Kuleli uqeqeshe kwiDStv Premiership emaqenjini okukhona kuwona iBloemfontein Celtic neLamontville Golden Arrows. Uqeqeshe neqembu lesizwe lika-U/20.
ULetsoaka uzwakalise uvo lwakhe ngoDumisani
Zuma, osayine kuMaZulu esuka kwiKaizer Chiefs, nangoGabadinho Mhango obekwi-Orlando Pirates.
Bobabili laba badlali, abaqeqeshile kwiCeltic, sebaziwa njengabahlulwa wukuziphatha ebholeni laseMzansi.
UZuma ugcine ekhonjwe indlela eNaturena kukhalwa ngokuthi ugxile ezinkambeni zikaFaro. UMhango naye uxoshwe kwiPirates ebikade ingasamdlalisi ngenxa yokuhlulwa yimpilo yangaphandle kwenkundla.
ULetsoaka nguyena okuthiwa uyakwazi ukumelana noZuma kwazise uhlale naye esemncane bekwiCeltic. Kuvele nokuthi iChiefs ikhale kuyena isixakekile ngoZuma, wakhuluma naye.
"Uma umdlali engazizwa ethola inselelo futhi ebona izinto zilula, uzogcina engasenawo umdlandla. Abadlali abakhethekile awukwazi ukubaphatha ngendlela efanayo nabanye. Konke kuqala kumqeqeshi. Uma engamqondi uZuma, emhlalisa ebhentshini, embeka kubalandeli futhi engamchazeli ukuthi kungani, uzogcina engasanendaba nokudlala. Yilapho-ke okuzoqala khona izinkinga. Ngiyethemba ukuthi umqeqeshi uzomthanda uZuma futhi uzoba yilokhu akufunayo. Uma kungenjalo kuzoba nzima," kusho uLetsoaka.
Emuva kokusayina kukaZuma noMhango kuMaZulu, kuqale izinkulumo ezingezinhle ezinkundleni zokuxhumana, abalandeli bethi iqembu lihlanganise abadlali abahluphayo futhi abazodakwa wubumnandi beTheku.
"UMhango ngimqeqeqeshile kwiCeltic. Akakaze anginike inkinga. Ungomunye wabadlali ababefika kuqala ejimini. Ngesikhathi esehamba wangitshela ukuthi akafuni ukulishiya iqembu kodwa uhamba ngenxa yemali. Angikaze ngibe nenkinga naye. Umdlali akashintshi nje esikhaleni kungekho okonakele," kusho uLetsoaka.
UZuma noMhango kulindeleke ukuthi babonakale okokuqala bedlubhe ezoSuthu emqhudelwaneni, iPrince Mangosuthu Legacy Cup, ozoba soLundi ngoJulayi 23. Kuzodudulana AmaZulu, Mamelodi Sundowns, Richards Bay FC nekhethelo lasoLundi naKwaNongoma.
Emuva kwalokho AmaZulu azodlala iKZN Premier's Cup ngoJulayi 30.
"Ngiyazi ukuthi uZuma uzoqhakaza kuMaZulu ngoba useduze nasekhaya eMgungundlovu futhi usondelene nomndeni wakhe. Uma indlela yokudlala yomqeqeshi ihambisana naye, uzobuyela ezingeni lakhe," kusho uLetsoaka.