ISuperSport ifuna ukuzithoba ngesicoco seDiski Shield
ISUPERSPORT United ifuna ukwesula izinyembezi zokwehlulwa yiligi ngokuwina iDStv Diski Shield. ISuperSport iqhathwe neKaizer Chiefs ngesikhathi kutonyulwa amaqembu azogadulisana kwiDiski Shield okuzogijimisana kuyona amaqembu ayisishiyagalombili aqede phezulu kwiDStv Diski Challenge yesizini ka-2021/2022.
Ngesizini edlule, iSuperSport yehluleke ngosuku lokugcina ukuwina iligi yeDiski egcine idliwe yiStellenbosch FC yaseKapa. Ngokuwina iDiski Challenge, iStellies izovakashela e-United kingdom iyodlala emqhudelwaneni iNext Generation Cup ngoJulayi 24 kuya ku-Agasti 1.
Ngemuva kokuphela kwesizini edlule, iSuperSport inyusele ngokugcwele esikimini esikhulu abanye babadlali abashaye into ecokeme okukhona kubona uThalente Mbatha waKwaMashu noGape Moralo. Iqembu elizowina iDiski Shield lizogoduka noR200 000.
Elizohlulwa kowamanqamu lizohlomula ngoR150 000 kuthi elizoqeda endaweni yesithathu lithotshwe inhliziyo ngoR100 000. Yonke imali ezowinwa ngamaqembu izonikelwa ezinhlanganweni ezisiza umphakathi.
Umqeqeshi waMatsatsantsa a Pitori, uThabo September, uthe bafuna ukuyiwina iDiski Shield.
"Amaqembu wonke anabadlali abasha, akuthina sodwa esizodlala ngabaqalayo ukudlala kulesi sigaba. Kuzoba nzima kodwa kufanele sigxilise imiqondo yethu kwiChiefs. Abafana kufanele bathole isivivinyo esinzima njengaso lesi seDiski Shield ukuze bejwayele ubunzima," kusho uSeptember.
"Siyafuna ukuyiwina iDiski Shield ngenxa yendlela ephele ngayo isizini edlule ukuze bathobeke amanxeba abafana bami. Sidlale kahle kakhulu ngesizini edlule. IDiski Shield izosikhombisa ukuthi siyilungiselele kanjani isizini entsha. Udlala imidlalo emithathu uwine indebe. Iyafana neMTN8 kwiDStv Premiership. Kuzoba nzima ngoba wonke amaqembu azodlala afanele ukuyiwina iDiski Shield."
IDiski Shield igcine ukudlalwa ngo-2019 idliwa yiLamontville Golden Arrows ngaphansi komqeqeshi uVusumuzi "Kanu" Vilakazi osepheka isikimu esikhulu saBafana Bes'thende. Kulokhu i-Arrows ngeke ikwazi ukuvikela indebe kwazise iqede endaweni ka-13 kwi-log yeDiski Challenge. IDiski Shield izodlalwa ngabadlali abaneminyaka engaphansi kuka-21.
Ekuqaleni kwesonto, umqeqeshi weChiefs uVela Khumalo, uthe kungenzeka badlale iDiski Shield bengasekho abadlali abanamava ngenxa yokuthi bazanyelwa izikhala emaqenjini adlala kwiGladAfrica Championship.
Kulaba badlali kukhona Samkelo Zwane no-Aiden McCarthy.
Khonamanjalo iPSL khona izolo iPSL imemezele uLuxolo Badi njengonompempe ovelele wangesizini edlule, uSandile Dilikane waba ngumsizi kanompempe oshaye into ecokeme.