UBabo udalule izinhlelo zeKhethelo
UMCULI wowokholo uBabo Ngcobo usebenzise umcimbi wokuhlonishwa kwakhe yiMasiqoqane
Albinism Foundation, eThekwini ngoMgqibelo ebusuku ukumemezela inyanga okuzophuma ngayo umculo wakhe noSgwili.
Sekuphele iminyaka engu-10 uBabo noSgwili, ababezibiza ngeKhethelo uma behlangene, bagcina ukukhipha ndawonye.
NgoMgqibelo uBabo uhlonishwe emcimbini i-Albinism and Disability Awareness Fundraising Tour eDurban Station.
“Kufike umbiko ngenyanga edlule wokuthi kunohlelo uMC Pholobas alwenzayo nenhlangano yakhe bacela ukuthi ngibe khona ngosuku asebelukhethile. Kuthe sekusondele ngatshelwa ukuthi ngizohlonishwa namanye amaciko ngegalelo esibe nalo ukweseka imikhankaso yabo yokulwa nokuhlukunyezwa kwabanebala elimhlophe,” kusho uBabo.
Uthe kumjabulisile ukuhlonishwa futhi yinto abengayilindele.
“Kuningi ebengilekelela ngakho kule nhlangano ngale kokuthi ngisebenze noSgwili. Kodwa ukuhlonishwa kungenze ngangazisola izinhlelo zokuthi mina noSgwili sizongena estudiyo senze into efunwa ngabantu. Bakuthakasele kakhulu ukuthi ngiveze ukuthi kunohlelo olunjalo basho ukuthi wumzuzu abebewuthandazela ukuthi wenzeke. Ekuqaleni kuka-Septhemba siyaqopha bese sikhipha ingoma ngo-Okthoba. Sineminyaka engu-10 sagcina ukusebenza ngakho sizokhipha into esezingeni abantu abazoyijabulela,” kuchaza uBabo.
Lo mculi kulezi zinsuku uphusha ingoma ethi Uyamthwal’umuntu ekwialbhamu asanda kuyikhipha Uhambo III.
Akahlonishwanga yedwa njengoba kuhlonishwe nomculi kamaskandi uKhuzani Mpungose noDkt Mngcwab’uyahlehla.
“Amazwi abenele ukuthi ngibongwe kodwa sithole namahawu amhlophe nezitifiketi ezinhle. Ngijabule kakhulu futhi bekungekhona okokuqala ngibongwa ngoba ngahlonishwa ngeziqu zobudokotela yiGood Shepherd College.”
Kulo mcimbi bekukhona uThokozani Langa, Mfiliseni Magubane nabanye.