Bajuxuze ngaphandle kwezinkinga

UMNIKAZI womcimbi iFact Durban Rocks, uDJ Tira, ubonge uhulumeni “ngokubakhulula” ngokuqeda imithetho yokuvimba ukubhebhetheka kweCovid-19.

UNgqongqoshe wezeMpilo kuzwelonke uJoe Phahla usanda kumemezela ukuthi akuseyona impoqo ukufaka isifonyo futhi awusekho nomgomo wokuthi abantu bangadluli isibalo esithile endaweni evalekile.

NgoMgqibelo, uTira ubesingethe iFact Durban Rocks eMoses Mabhida Stadium nebingeminye yemicimbi eyenziwa ngemuva komkhulukazi obuseGreyville Race Course.

“Kuhambe kahle konke etendeni le-Afrotainment nakwiFact. Azikho izigameko ezimbi ezibikiwe. Ngithanda ukubonga abantu ngokuziphatha kahle nangokuphuma ngobuningi babo ukweseka imicimbi. Sibuyile siyasebenza, siyabonga nohulumeni ngokusikhulula,” kusho uTira.

KwiFact

Durban Rocks bekunamatende amathathu lapho bekunandisa khona abantu abehlukene. Bekunendawo ye-house nenye esakhosombana nakhona obekudlala oDJ.

Etendeni elikhulu yilapho ebezenzeka khona kunandisa oSlenda da Dancing DJ odlale waze wagibela phezu kwamatafula kwahlanya abantu, Nasty C, AKA, Qwabe Twins, SOS, Blxckie, Kweyama Brothers, DJ Merlon, Rosetta Deep, Nomfundo Moh nabanye. Uhlelo beluphethwe nguMC Slot, Sizwe Mdlalose, Khaya Dladla noSomizi.

Nakwezinye izindawo njengaseGagasini eSouth Beach, eKudta eShaka Marine World kwiMother of All Parties bezibuya.

Okhulumela amaPhoyisa kaMasipala uBoyzie Zungu uthe azikho izigameko ezibikiwe.

“Angifuni ukuqamba amanga abantu bajabule kahle. Akuvamisile vele ukuthi kube nezigameko ezithile,” kusho uZungu.