Sekuthenjwe amaphoyisa kwelokufa kukafata
USUBEKE ithemba lawo emaphoyiseni umndeni kafata waseBergville obelahlekile, isidumbu sakhe satholakala edamini ngempelasonto.
Umfowabo kaFata Joseph Monamoholo
Bheki Motloung (55), uMnuz Khantsi Motloung, uthe yize bese kuphele isikhathi eside umfowabo edukile kodwa bebesalokhu bebenethemba lokuthi uzotholalaka ephila njengoba sebethole ukuthi ushonile sebefisa ukuthi kuboshwe izigilamkhuba ezimenzakalisile.
Isidumbu sikaMotloung, obewuFata kwiPherishi iSt Yves khona eBergville, sibonwe ngabantu abebezingela, sintanta edamini, iWoodstock ngoLwesihlanu. Imoto agcinwa ehamba ngayo ngoJuni 5, ayikatholakali namanje. UMotloung uthe kusenzima kakhulu ukwamukela indlela umfowabo ashone ngayo kodwa bathemba ukuthi uNkulunkulu uzobapha amandla.
"Umfowethu bese kuphele iminyaka eyevile ku-20 engumfundisi kumapherishi ehlukene, KwaZulu-Natal. Ubehlale njalo encoma, ethi uphatheke kahle, idumele uma eseshona ngale ndlela. Amanye amalungu omndeni wakithi awakwazanga nokuthi asuke ekhaya eVrede, eFree State, azobona isidumbu sakhe ngenxa yokwethuka nokuphatheka kabi," kusho uMotloung.
UFata David Sithole owumfundisi obhekelele ezomthetho nokuphenywa kwamacala kwisiFunda bubhishobhi samaKhatholika eThekwini, uthe ushayelwe ucingo ngabantu abebezingela bathi babona isidumbu esintantayo kulo leli damu. Wase ethinta umseshi wecala.
"Amaphoyisa athole isikhwama semali ephaketheni lakhe, kuso bekukhona umazisi. Akukacaci ukuthi ubulelwe yini kodwa abaphenyi bethu basebenza ngokuzimisela ukuze bathole ukuthi ubulewe yini. Sibonga nokwesekwa esikuthola embuthweni wamaphoyisa," kusho yena.
Uqhube wathi banxusa ukuthi noma ngubani okungenzeka abe nolwazi mayelana nokuthi kwenzekani kuFata Motloung, abathinte. Uthe isidumbu sikaMotloung sisagcinwe emakhazeni kahulumeni eLadysmith. Ezinkundleni zokuxhumana amakholwa abekhala.
USamke MamDkt Khumalo-Dludla, ekhasini leFacebook, uthe: "Kubuhlungu bakithi ngofata wethu, hhawu, ukungcola kwabantu."
UMpho Ndzimbomvu uthe: "Awu ngofata wethu owasiqinisa, ekujuleni kwenhliziyo yami bengazi ukuthi lokhu kuduka kwakhe kuzophetha ngezindaba ezimbi. Aphumule umphumulela wafuthi,"
UFata Kwenzakufani Zondi esitatemendeni esithunyelelwe abezindaba uthe: "Sibonga uNkulunkulu ngokutholakala kwesidumbu sakhe, siyakholwa ukuthi umphefumulo wakhe manje uphumule kuye endaweni enokuthula.”
UConstable Thenjiswa Ngcobo, okhulumela amaphoyisa KwaZulu-Natal, uthe kutholakele isidumbu sowesilisa edamini eBergville.
"Kuvulwe idokodo lophenyo, eliphenywa ngamaphoyisa asesiteshini i-Upper Tugela," kusho uConstable Ngcobo.