Bafuna kuxoxwe ngombango wezikhundla kwi-ANC
ABESEKA loyo owayengumqondisi ehhovisi likandunankulu waKwaZuluNatal, uMnuz Nhlanhla Ngidi, bafuna kuxoxiswane ngombango wezikhundla olindeleke engqungqutheleni yokukhetha ubuholi be-ANC KwaZulu-Natal ngesonto elizayo.
Labo abeseka uNgidi sebeqale izingxoxo nabanye balabo abagaqele ukuhola i-ANC ngenhloso yokuthola isivumelwano sokusebenzisana.
Abeseka uNgidi banokwesabela ukuthi umbango okhona njengamanje ungadala olunye uqhekeko kwi-ANC.
Njengamanje maningi amagama amataniswa nombango wokuhola i-ANC KwaZulu-Natal.
Phakathi kwamagama avelayo kukhona elikaSihlalo we-ANC, uMnuz Sihle Zikalala, elikaMgcinimafa we-ANC, uNkk Nomusa Dube-Ncube, nelelungu lesigungu esiphezulu kwiANC, uMnuz Siboniso Duma.
Kuphinde kuvele igama likasomabhizinisi futhi ongumengameli waMaZulu FC, uMnuz Sandile Zungu.
Abeseka uNgidi bathe kubalulekile ukuthi zonke izinhlangothi ezibangayo zixoxisane ukuze ungeke ube mkhulu umbango engqungqutheleni.
Okhulumela abeseka uNgidi, uMnuz Mandla Chiliza, ukuqinisekisile ukuthi baphezu kwezingxoxo.
"Yebo, zikhona izingxoxo ezishubile esiphezu kwazo.
Inhloso yethu ukusebenzisana nabanye amagama abo avelayo embangweni wezikhundla. Asifuni ukuthi kube nombango omkhulu engqungqutheleni ngoba lokho kungase kulimaze i-ANC."
UChiliza uthe bona abajahile izikhundla, abakufunayo ukuthi kwakhiwe kabusha i-ANC.
"Inhloso ukwakha umbutho, i-ANC. Izikhundla azibalulekile kithina. Thina into esiyifunayo ukuthi sibe nabaholi abazokwazi ukuhola i-ANC ngendlela eyiyo. Esikuqaphelile ukuthi muva nje abantu abebehola i-ANC bebeqhelelene kakhulu nemiphakathi.
"Yingakho sibone imiphakathi nayo iziqhelelanisa ne-ANC nokwenze ukuthi i-ANC yehlelwe ukwesekwa.
“Njengamanje sifuna abaholi abazolungisa lezo zinkinga ngaphambi kokhetho lwango-2024."
Lolu hlangothi luphinde lufune loyo owayengumholi wombutho womakadebona, uMnuz Nameh Mogale, ukuba a be ngunobhala we-ANC esifundazweni.
UMogale waziwa kakhulu ophikweni lwamasosha ayelwa nobandlululo, uMkhonto weSizwe.
Ingqungquthela yokukhetha ubuholi be-ANC KwaZulu-Natal izokuba ngesonto elizayo, eThekwini.
Le ngqungquthela ibhekwe ngabomvu njengoba kubhekwe kweyokukhetha ubuholi be-ANC kuzwelonke, ezokuba ngoDisemba.