I-EFF ichitha eyokuxosha ikhansela elishonile
I-EFF iyakuchitha ukuthi bese lixoshiwe ikhansela layo okusolwa ukuthi lizibulele, uMnuz David Msomi, oshone ngeledlule.
UMsomi, obephinde abe ngunobhala we-EFF kwisifunda uMgungundlovu, ushone emva kokuvela kwamahlebezi okuthi uxoshiwe.
Kusolwa ukuthi waphuza umuthi wediphu wabe eseyashona.
Umthombo osondelene nodaba uthe uMsomi ushiye incwadi ende lapho ebechaza khona ngezinkinga abebhekene nazo.
Ushona nje, bese kunesikhathi eside emisiwe eqenjini nasekubeni yikhansela leqembu kuMasipala waseMgungundlovu.
Wamiselwa izinsolo zenkohlakalo.
Yize kunamahlebezi okuthi uMsomi ubesexoshiwe, usihlalo we-EFF kwisifunda uMgungundlovu, uMnuz Mzwakhe Mpulo, ukuchithile lokho.
Ekhuluma enkonzweni yokukhumbula uMsomi ebingoLwesihlanu, uMpulo uthe uMsomi ushone esenguye unobhala we-EFF.
"Akakaze axoshwe kwi-EFF, wamiswa kuphela."
Ngokuthola kweSolezwe, uMsomi ubesolwa ngokuqola usomabhizinisi esebenzisa igama lomkhandlu.
Kuthiwa wathembisa usomabhizinisi ithenda, wamkhokhisa imali.
Usomabhizinisi wagcina engayitholanga ithenda.
Bekungesikhona okokuqala uMsomi emiswa emsebenzini.
like labika phambili ngokumiswa kwakhe.
Ngaleso sikhathi wayesolwa ngokuqola abantu abasuswa ngesikhathi kwakhiwa inxanxathela yezitolo eMgungundlovu, i-Edendale Mall.
Kuthiwa wabakhokhisa imali, wathembisa ukuthi uzobalwela ukuze bathole izinxephezelo.
Amalungu amabili omndeni anqabile ukukhuluma neSolezwe.
Obekhulumela umndeni enkonzweni yokumkhumbula akazange aphumele obala ngembangela yokushona kukaMsomi.
Abesebenza nabo kwamasipala nabo abazange balimise ngembaba elokuthi uzibulele kepha izinkulumo zabo zikhombise ukuthi uzibulele.
USomlomo womkhandlu, uNkk Nonhlanhla Gabela, ugqugquzele abebehambele inkonzo ukuthi bafune usizo uma benezinkinga.
"Lokhu okwenziwe uMsomi, singakwenzi. Noma ngabe unenkinga engakanani, lesi akusiso isisombululo. Ziningi izinkinga esibhekene nazo esikhathini samanje.
"Abantu abanjengoMsomi siyabadinga ukuze silwe nezinkinga ezifana nokubulawa kwabantu besifazane nezinye. Noma ngabe kunzima kangakanani, ningayenzi lento. Khulumani niphinde nifune usizo."
IMenenja kaMasipala, uDkt Ray Ngcobo, ithe kubashaqisile ukushona kukaMsomi.
"Khona besazi ukuthi uke wathi ukunyamalala nokuthi kunobunzima abebhekene nabo. Kodwa besingalindele ukuthola umyalezo othi akasekho."
UMsomi ufihlwe eMpendle izolo. Bekungokokuqala eba yikhansela kanti isikhundla sikanobhala we-EFF kwisifunda uMgungundlovu sona ubesesiphathe amahlandla amabili.