I-Ipid icubungula isicelo sokuphenya olwepulazi likaRamaphosa
UPHIKO oluqapha ukusebenza kwamaphoyisa, i-Independent Police Investigative Directorate (Ipid), luthi luzosicubungula isicelo sokuba luphenye iqhaza elabanjwa amaphoyisa ekuvimbeni ukuphenywa lwesigameko sokuphangwa kwemali epulazini likaMengameli Cyril Ramaphosa.
Lokhu kuza emva kokuthi i-ATM ibhalele i-Ipid, iyicela ukuba iphenye izinsolo zokuthi amaphoyisa aba nesandla ekutheni singaphenywa lesi sigameko sango-2020.
Okhulumela i-Ipid, uNksz Lizzy Suping, uthe bahlela ukuhlangana nabaholi be-ATM maduze, ngaphambi kokuthi banqume ukuthi bazoluphenya yini lolu daba.
“Kukhona izinto okufanele sizenze ngaphambi kokuthi sithathe isinqumo. Ezinye zezinto abafuna ukuthi siziphenye akuzona izinto okufanele ziphenywe yithina.
“Ingakho sesimeme ubuholi be-ATM, ukuze sithole isitatimende sabo. Emva kokuhlangana nabaholi be-ATM, sizobe sesithatha isinqumo ukuthi sizoluphenya noma cha lolu daba.”
I-ATM ifuna i-Ipid iphenye izinsolo zokuthi amaphoyisa asezikhundleni eziphezulu okubalwa kuwo uKhomishana wamaPhoyisa, uLieutenant General Fannie Masemola, nowayengukhomishana wamaphoyisa, uGeneral
Khehla Sitole, babenolwazi ngokuphangwa kwepulazi likaRamaphosa.
Umholi we-ATM, uMnuz
Vuyo Zungula, uthe kunomqingo wamaphoyisa oputshuke eNamibia, okhombisa ukuthi uMasemola noSitole babenolwazi ngokuphangwa kwepulazi likaRamaphosa.
UZungula uthe bafuna amiswe wonke emsebenzini amaphoyisa abandakanyeka kulesi sigameko.
Ngokwesitatimende saloyo owayengumphathi wezinhloli, uMnuz Arthur Fraser, okunguye owavulela uRamaphosa icala, alikho icala elabikwa emaphoyiseni.
Isitatimende sikaFraser siveza ukuthi abaphangi bashaya bachitha no-4 million wamadola ase-US ayefihlwe empahleni yasendlini.
Isitatimende sikaFraser siqhuba ngokuthi abaphangi batholwa sebeqe umngcele waseNamibia, lapho bedabuka khona.
Kuthiwa bashaywa base befumbathiswa ukuze bavale imilomo.
Khonamanjalo, ihhovisi loMvikeli woMphakathi liveze ukuthi selilulele uRamaphosa isikhathi sokuba aphendule imibuzo yalo.
Ihhovisi loMvikeli woMphakathi liphenya uRamaphosa ngalolu daba kulandela ukuthi luthole izikhalo ezine. Lalikade linikeze uRamaphosa umnqamulajuqu wangoJuni 22 ukuba aphendule imibuzo yalo.
NgoLwesihlanu, ihhovisi loMvikeli woMphakathi liveze ukuthi uRamaphosa ucele ukwelulelwa isikhathi, wakhala ngokuthi ubematasa.
Akucaci ukuthi unini umnqamulajuqu omusha onikezwe uRamaphosa.