Kusaqhubeka ukucishwa kukagesi ngenhloso yokuwonga
INKAMPANI ephehla ugesi, i-Eskom, imemezele ukuthi ukucishwa kukagesi ngenhloso yokuwonga kuzoqhubeka nokufakwa ngaphansi kwesigaba sesithupha kusukela namuhla.
Lesi simemezelo i-Eskom isenze izolo lapho iveze khona ukuthi lesi sigaba sizoqaliswa ngezikhathi zantambama.
Iphinde yaveza ukuthi kulindeleke ukuthi ukucishwa kukagesi ngenhloso yokuwonga kufakwe ngaphansi kwezigaba ezahlukene ngokuqhubeka kwesonto.
Esitatimendeni, le nkampani iveze ukuthi inkinga yokucishwa kukagesi ngenhloso yokuwonga kulindeleke ukuthi kuqhubeke emasontweni ambalwa ezayo njengoba isalokhu iqhubeke njalo inkinga yokushoda kwamandla kagesi.
“I-Eskom iyafisa ukuxwayisa umphakathi ukuthi kusazothatha amasonto ambalwa ukuthi amandla kagesi abuyele esimeni esifanele kulandela isiteleka sezisebenzi zayo,” kusho isitatimende.
Sithe ukubuyela kwesimo kwesejwayelekile kuncike ekubuyeleni kwabasebenzi ngokugcwele ukuze bezoqala balungise lapho konakele khona kwiziphehlimandla.
“Sicabanga ukuthi ukucishwa kukagesi ngenhloso yokuwonga kungehliselwa esigabeni sesibili ngempelasonto kodwa i-Eskom izozazisa izakhamuzi ngazo zonke izinguquko ezozenza,” kusho isitatimende.
Kusuka phakathi kwamabili izolo kuya ngo-5 ekuseni namuhla, le nkampani ibikufake esigabeni sesibili ukucishwa kukagesi.
“Kusukela ngo-5 ekuseni kuze kube u-4 ntambama, ukucishwa kukagesi kuzofakwa esigabeni sesine, bese kuthi kusuka ngo-4 ntambama kuya ku-10 ebusuku kuzofakwa ngaphansi lwesigaba sesithupha. Bese kuthi kusuka ngo-10 kuya ku-12 ebusuku kuzobuyiselwa esigabeni sesine,” kusho isitatimende.
Isitatimende sithe ngoLwesibili kusuka phakathi kwamabili kuya ku-5 ekuseni, le nkampani izokufaka ngaphansi kwesigaba sesibili ukucishwa kukagesi, ngaphambi kokuthi ikwenyusele esigabeni sesine phakathi kuka-5 wasekuseni kuya ku-4 wantambama, bese kuthi ukusuka ngo-4 ntambama kuya ku-10 ebusuku kube sesigabeni sesihlanu.
“Emva kwalokho ukucishwa kukagesi ngenhloso yokuwonga kuzokwehliselwa esigabeni sesine,” kusho isitatimende.
I-Eskom iqhube yathi ibonga izisebenzi zayo eziyile emsebenzini yize zibhekane nezingqinamba ukwenza lokho.
I-Eskom ikhumbuze izakhamuzi ukuthi ukucishwa kukagesi ngenhloso yokuwonga kuyisinyathelo sokugcina inkampani efinyelela kuso, sekuzanywe konke.
“Ngakho siyacela ukuthi abantu bazame ukuwusebenzisa ngendlela efanele ugesi,” kusho isitatimende.