Idinga ukubambisana kwazo zonke zinhlaka inkinga kagesi
UKUNQANYULWA kukagesi ngokwesigaba sesithupha okuqhubekayo, kuphoqa ukuthi kusukunyelwe phezulu ukuxazulula inkinga yokuntuleka kukagesi. Kungenjalo, izwe lisengcupheni yokuthi kugcine kuyinto eyamukelekile ukucinywa kukagesi ngokwesigaba sesithupha kuya phezulu.
Ukunqanyulwa kukagesi ngenhloso yokuwonga kulimaza umnotho wezwe ngoR4 billion ngosuku. Kuthiwa kungenzeka ukuthi umnotho ulahlekelwa yimali engaphezu kukaR4 billion ngosuku ngenxa yokuthi kawaziwa kahle umonakalo odaleka emabhizinisini amancane.
Ukuhlanganyela enkingeni kagesi, kubaluleke kakhulu njengoba kuvela ukuthi kuningi okuyimbangela yezinkinga e-Eskom kepha okungatshelwa abantu.
Yize kukhalwa ngesiteleka sabasebenzi e-Eskom kepha kuyaziwa ukuthi isimo besivele sibheda nangaphambi kwesiteleka okubikwa ukuthi asikho emthethweni. Eqinisweni isiteleka senze inselelo ebhekene nezwe yahlala obala.
Njengengxenye yesixazululo kuzosiza ukuthi i-Eskom isebenzisane nosomabhizinisi ukuthola isisombululo esiphusile.
Enye inkinga ebikwayo wumdonsiswano wongqongqoshe okufanele engabe bayasebenzisana ekulweni nezinselelo. Iyakhathaza imibiko yokungaboni ngaso linye kukaNgqongqoshe wokuMbiwayo, uMnuz Gwede Mantashe, nowezamaBhizinisi kaHulumeni uMnuz
Pravin Gordhan. Ukudonsisana kongqongqoshe kunomthelela ongemuhle e-Eskom. Kudala nokuthi kube nokungahleleki kwezinto kule nkampani.
Kuvela ukuthi iziteshi zokuphehla ugesi ezinenkinga enkulu yiKusile, Komati, Hendrina, neTutuka. Kuthiwa ziyalungiswa kodwa zisheshe zife.
Sekuyisikhathi sokuthi uhulumeni nazo zonke izinhlaka basebenzisane ukuze kugwemeke ukuthi ugesi unqamuke ngokwesigaba sesithupha kuya kwesesishiyagalombili eminyakeni ezayo. Kufanele kuqalwe ngokushesha izindlela ezahlukene zokuphehla ugesi.
Kuthiwa kungaqalwa ngogesi womoya nelanga okuyiwona ohlanzekile njengoba i-Eskom izimisele ngokuphehla ugesi ongayilimazi imvelo.