Izinhlelo zokuhlanza ukungcola eThekwini
INKINGA yokungaqoqwa kukadoti emiphakathini eyakhele iTheku kulindeleke ukuthi ixazululeke ngemuva kokwethulwa kwamaloli okuqoqa imfucuza angu-47.
Phambilini ukungaqoqwa kukadoti kube yinkinga enkulu eThekwini umasipala usebenzisa osonkontileka ukuwuqoqa.
Lokhu kusolakala ukuthi kwagcina sekuvula intuba yenkohlakalo ngamathenda okuqoqwa kukadoti okwaze kwaholela ekuboshweni kowayeyimeya yeTheku, uNkk Zandile Gumede, ababeyizikhulu zomkhandlu, amakhansela nosonkontileka.
Ngenxa yenkohlakalo, udoti wawusala uyizindimbane ungaqoqiwe ezindaweni eziningi ikakhulukazi eMlaza, omunye usakazwa emgwaqweni ngosonkontileka ababekhala ngokuthi umasipala awubakhokhelile.
Umasipala wabe usuthatha isinqumo sokuwanqamula la mathenda, waziqoqela ngokwawo udoti.
NgoLwesihlanu iMeya yeTheku, uMnuz Mxolisi Kaunda, iphini layo, uMnuz Philani Mavundla, nezikhulu zomkhandlu, bethule amaloli nezimoto ezinkulu zokuqoqa imfucuza okudle uR213 million, eSpringfield.
Lo mkhandlu uthe ngo-2019 waqhamuka nesu lokuthi ubeke eceleni imali enguR500 million ozoyisebenzisa iminyaka emithathu ngenhloso yokubhekana nezindleko zokuqoqwa kukadoti eThekwini.
Kulolu hlelo kwakuzothengwa izimoto ezintsha zokuqoqa udoti, kutholakale indawo entsha okuzolahlwa kuyona imfucuza bese kuthathwa abasebenzi ababeyitoho baqashwe ngokugcwele ngaphansi kwalo mkhandlu.
Ngo-Okthoba wangonyaka odlule umasipala uthe uqalile wathenga izimoto ezingu-59 okudle imali enguR170 million.
UKaunda uthe amaloli abekade esetshenziswa abesegugile yingakho amanye abesefa njalo.
“Sizoshintsha indlela esibutha ngayo udoti emiphakathini. Sizophinde siqale umkhankaso wokufundisa abantu ngokuqoqwa kukadoti,’’ usho kanjena.
Eqhuba uthe kule ndawo entsha yokulahla udoti, abayithole eNtshongweni, bafuna ukuphendula imfucuza bakhiqize ugesi futhi kugwenywe nokungcoliswa komoya ngesisi.
UKaunda uthe umsebenzi wokuhlanzwa kwedolobha akumele kube owomkhandlu kuphela kodwa nabantu kumele babambe iqhaza.
“Siyathemba ukuthi uma seyihlanzekile indawo yethu izokwazi ukuthi ihehe nabatshalimali nabavakashi. Silungisa amamitha okukhokha lapho kupaka khona izimoto ukuze zingahlali usuku lonke okwenza kungashaneleki lapho ezisuke zimi khona,’’ usho kanjena.
Uthe uhlelo lokukhucululwa kokungcola lufaka phakathi nokuvuselelwa kwamabhilidi amadala asephenduke izidleke zezigilamkhuba.