UZungu ubheke isicoco kuTruter ngesizini ezayo
UFUNA inkomishi kwisizini ka-2022/23, uSandile Zungu, ongumengameli waMaZulu
FC.
USuthu lube ngelinye lamaqembu angene agxila emakethe selokhu kuvulwe iwindi lokuhwebelana ngabadlali ukulungiselela isizini entsha yeDStv Premiership. Okwamanje lusasike abayisishiyagalolunye.
Laba ngoGeorge Maluleka, Dumisani Zuma, Augustine Kwem, Gabadinho Mhango, Thendo Mukumela, Veluyeke Zulu, Riaan Hanamub, Ethan Brooks, noRally Bwalya.
Kunemibiko ethi maduze, lungase lujoyinwe uRamahlwe Mphahlele oxoshwe iKaizer
Chiefs.
Nakuba uZungu engalivezanga igama likaMphahlele kodwa ukuqinisekisile kuleli phephandaba ukuthi ukhona umdlali weshumi abazomethula kungekudala.
Ekupheleni kwesonto eledlule, leli phephandaba linikele eKings Park Stadium, lapho kuziqeqeshela khona uSuthu. Litheleke uZungu ebambe inguyazana nabadlali kanye nethimba labaqeqeshi.
libe selimbuza ukuthi ubebhungani nabadlali nabaqeqeshi?
Uthe ubebatshela ukuthi kwisizini entsha ufuna balelwe ukubuyela kwiCaf Champions League.
Akugcini lapho njengoba egcilele ukuthi ufuna baqede neshobolo lokunganqobi izinkomishi.
"Siyavumelana nabaqeqeshi ukuthi iqembu lethu seliqine kuzona zonke izindawo. Sisike abadlali bezinga eliphezulu.
“Kule sizini (ezoqala ngoAgasti) ngifuna sigile izimanga. Ngifuna kwisizini ka-2022/23, Usuthu lubalwe namaqembu enza kahle kwiDStv Premiership,“kusho uZungu
“Ngibatshelile abaqeqeshi nabadlali ukuthi kule sizini ngifuna noma inkomishi eyodwa. Okunye engibatshele khona ukuthi ngifuna sibuyele kwiChampions League. Lesi isindlalelo sika-2032.
“Ngifuna sihlanganise iminyaka ewu-100 ngezinga eliphezulu. Sesiside kakhulu isikhathi singanqobi zinkomishi. Okuhle ukuthi sesinaso isipiliyoni semidlalo yase-Afrika. Ngeke kusafana nakuqala."
Sekuphele iminyaka ewu-30 uSuthu lwagcina ukuphakamisa inkomishi. Lwagcina ngeCoca Cola Cup lusacijwa uClive" The Dog" Barker.
Ngesizini edlule, ludlale okokuqala kwiChampions
League, lwakhishwa esigabeni samaqoqo. Kwiligi, lugcine lulele endaweni yesikhombisa nokulifaka kwiMTN 8 yangesizini ezayo.
UZungu uthe uyalethemba ithimba labaqeqeshi abalihlanganisile eliholwa uBrandon Truter. Lo mqeqeshi ulande uKamaal Sait abesebenze naye kwiSwallows ukuthi azobe iphini lakhe. AmaZulu abuye asayinisa uHannes Abselon ongumqeqeshi wonozinti.
Ungene esikhaleni sikaMoeneeb Josephs.
"Ngiwulolu hlobo lo muntu othanda ukumnika inkululeko umqeqeshi. Angifuni uma ehluleka athole isizathu sokusola mina. UTruter simnike igunya lokuzakhela yena ithimba azosebenza nalo. Okuhle ngaleli thimba ukuthi liyazana, lisebenze isikhathi eside ndawonye. Njengoba besithenga abadlali, besibonisana sonke. Ngiphinde ngijatshuliswe ukuthi uSait uyingane yoSuthu. Eminyakeni edlule wayedlala kulo," kusho uZungu.