UZondo akanavalo ngokuya koweCaf neRoyal AM
UMQEQESHI omusha weRoyal AM, uKhabonina Zondo, akakungabazi ukulungela kweqembu lakhe iCaf Confederation Cup, elizomela kuyona iPremier Soccer League (PSL), kulandela ukuqeda kwalo endaweni yesithathu kwiDStv Premiership ka-2021/2022.
UZondo umenyezelwe ngoLwesihlanu njengenhloko yeThwihli Thwahla nabadlali abasha, uSamir Nurkovic obekwiKaizer Chiefs, Andre de Jong osuka kuMaZulu FC, Ruzaigh Gamildien noKhethukuthula Ndlovu, bobabili abebekwiSwallows FC.
Lo mqeqeshi oke wasebenza kuleli qembu liseyiRoyal Eagles ngo-2016, ungene esikhundleni sikaJohn Maduka, osule isigubhukane wajoyina omakhelwane iMaritzburg United.
Kuthusile nokho ukuthi uMaduka ushiya kwiRoyal AM ngendlela ashiye ngayo ekubeni eyifake emqhudelwaneni omkhulu wase-Afrika.
Umthetho weCaf uphoqa ukuthi abaqeqeshi abadabuka e-Afrika kumele babe nezicucu ze-Caf A noma i-Uefa Pro, ukuze bavunyelwe ukuhlala ebhentshini emiqhudelwaneni yayo, eminye yawo okuyiConfederation Cup neChampions League.
Eminye imithombo yabezindaba ibike ukuthi uMaduka ushiye kwiRoyal AM ngoba engenazo lezi zicucu ezifunwa yiCaf.
NakwiCape Town City kunongabazane olufanayo ngomqeqeshi u-Eric Tinkler, ngoba kuvela ukuthi akanazo izimfanelo ezidingekayo, unesitifiketi se-Uefa A licence.
Akazange athande ukunaba ngalokhu uZondo kodwa waqhakambisa ubumqoka bokuthi, kuqambe kuqala lo mqhudelwano yena nabadlali babe sebejwayelene ngokwanele.
“Akuyona indawo yami ukukhuluma ngamaphepha abanye abaqeqeshi kodwa okumqoka ukuthi sikhumbule sonke kwiRoyal
AM, ukuthi siya lapho singakaze sidlale khona okuyinto esiphoqayo ukuthi sibumbane,” kusho lo mqeqeshi ephebeza indaba yamaphepha adingekayo.
“Uma ngizikhulumela mina, ngicabanga ukuthi ngiyilungele ngayo yonke indlela (ngokwezimfanelo) iConfed Cup kodwa okuyikhona engikuthandazela kakhulu ukuthi, kuthi kuqambe kushaya isikhathi sokuqala (iConfed Cup), mina nabadlali bami sibe sesijayelene ngokwanele.” Lo mqeqeshi oseke wasebenza kwiBloemfontein Celtic neLamontville Golden Arrows, uxwayise leli qembu ngokuthi emidlalweni yase-Afrika, kufanele balindele noma yini.
“Kuhlukile lapho siyakhona ngakho-ke njengoba sibasha sonke (emidlalweni yase-Afrika), kunalawo mandla nomfutho wokufuna ukwenza ngendlela encomekayo.
“Kufanele siye ngawo wonke amandla esinawo kwiConfed kodwa okumqoka manje ukuthi sijwayelane sonke ngoba akufanele kube imina kuphela ojwayela bona kodwa nabo kufanele bangijwayele,” kusho uZondo.
Uthe kumenza azizwe ehloniphekile ukuthi iRoyal AM imqoke kunohide lwabaqeqeshi abajika nelanga, waphinde waqinisekisa nokuthi ngeke alishintshe ithimba labaqeqeshi alificile ngoba useke wasebenza nabo phambilini.