Obolekiswe yiPirates ufuna ukushintsha ukwenza kwiBay
UMDLALI obolekiswe yi-Orlando Pirates kwiRichards Bay FC, uNkanyiso “Pelembe”
Zungu, uvuma eyokuphuma endleleni okuholele ekutheni aphenduke ukudla kwebhentshi kweZimnyama.
UZungu ngomunye wabadlali abangu-10 abasha abamenyezelwe yiNatal
Rich Boyz ngesonto eledlule ngenhloso yokuqinisa iqembu ngaphambi kokuqala impilo entsha kwiDStv Premiership.
IBay iwine iligi yeGladAfrica Championship ngesizini edlule. Ukujoyina iBay kukaZungu kufana nokubuyela ekhaya kwazise ungumfana wendawo njengoba ezalwa eNcawane okungaqhelile naseRichards Bay.
Nokho kwabaningi kusenovalo lokuthi uzobuyela empilweni yokungaziphathi kahle eholele ekutheni agcine engasadlali kwiPirates. NgoMashi, uZungu umisiwe kwiPirates emuva kokuboshelwa icala lokushaya intombi yakhe. Kugcine kuvela nokuthi useziqeqesha neqembu leDiski Challenge.
"Kwesinye isikhathi zikhona izinto ezenzekayo. Kwesinye isikhathi kuba wukhwantalala olukuficayo. Nakuba ngingeke ngichaze ukuthi kungani.
Kodwa ngibe nokhwantalala ngaze ngazithola ngikwezinye izindawo okungafanele ngibe kuzona. Lokhu akuhlangene nebhola, yizinto engingeke ngizisho.
“Yizinto ezithinta mina uqobo. Kodwa manje ngisesimeni esihle. Ngizelwe kabusha. Ngifuna nje ukudlala ibhola okuyinto engazalelwa yona," kusho uZungu.
Ikhono likaZungu enkundleni alingatshazwa futhi abalandeli beBay bazothandazela ukuthi agxilise umqondo wakhe ebholeni ukuze iqembu labo lizoqoqa amaphuzu zibekwa kwiPremiership.
IPirates yamsayinisa maphakathi nesizini ka-2019/2020 kade enza into yamehlo kwiStellenbosch FC.
UJomo Sono othathwa njengenkosi yebhola kuleli, wake wancoma lo mdlali njengomunye wabambalwa okwazi ukushaya iphasi enenkosi phakathi.
"Uma ungumdlali kufanele uzihloniphe, kungakhathaleki ukuthi udlalela liphi iqembu. Kufanele uhloniphe noma yiliphi iqembu olidlalelayo. Njengoba ngilapha nje ngifuna ukudlala ibhola.
“Abantu abebekade bekholelwa kimina babone le nto abebekade befuna ukuyibona kimina nabalandeli abangithandayo nabangani bajabule. Engikufunayo wukudlalela iRichards Bay sifinyelele ezingeni esifuna ukufinyelela kulona. Ngifuna ukubuyela eqenjini lesizwe, ngiveze ikhono lami, abantu babone ukuthi ngiyalazi ibhola. Yisifiso sami engifuna ukusibona sifezeka leso," kusho uZungu.
Yize izinto zingamhambelanga kahle kweZimnyama kodwa ukholwa wukuthi ufike kuzona ngesikhathi esifanele.
"Ngibona ukuthi uma uJehova esekunike isikhathi sokuthi uqhubekele phambili kufanele ukwenze lokho. NguJehova onqumile ukuthi nginyuke ngiye kwiPirates. Uma ungumdlali kufanele uqine. Okwenzekayo, kuzokwenzeka. Kodwa kufanele uqine. Ngiqhubekile ngaziqeqesha, ngaba sesimeni esifanele. Ngeke ngizifake (enkundleni). Kufanele ngisebenze kanzima, ngilwele indawo yami. Isikhathi sami besizofika. Osekwenzekile, sekwenzekile," kusho uZungu.