I-CCMA ichithe abakhala ngokubizwa ‘ngezinkawu’
LICHITHIWE icala labasebenzi baseMpangeni, abebefake umqashi kwiCommission for Conciliation Mediation & Arbitration (CCMA), bemsola ngokubabiza ngezinkawu.
NgoMeyi laba basebenzi bathinta Isolezwe bekhala ngokuthi induna yabo enkampanini iTau Pele Construction (Pty) LTD, ibabize ngezinkawu.
Yize laba basebenzi baveza ukuthi babizwa ngezinkawu beyiqoqo labasebenzi abangu-10 kodwa bathathu kuphela abahambise lolu daba kwiCCMA.
Abagcine befake icala kwiCCMA ngoMnuz Moses Banda, Sidney Mlambo noMbongiseni Mthiyane, abathe kabazi ukuthi kungani abanye bengaludluliselanga phambili udaba.
Baveze ukuthi ngaphambi kwesigameko sangoMeyi, babengakaze babe nenkinga nomqashi wabo obizwa ngoNicko.
Sekuthulwa ubufakazi abamangali bebemile ekutheni uNicko wababiza ngezinkawu kodwa abanye ababekhona ngosuku lwesigameko, bakuphika lokho.
UMnuz Lejoli Limo oqashwe njengomshayeli weloli, uthe akazange ezwe uNicko ecwasa abantu kodwa wamuzwa ecela abasebenzi ukuba bamsize ngokuwasha iloli nokuyinto ayisho ngesiBhunu.
Uveze ukuthi abanye abasebenzi basukuma bayokwenza okwakushiwo kodwa uBanda nabanye abazange banyakaze.
Uthe ngakusasa babe sebezwa amahlebezi okuthi uBanda utshele abasebenzi ukuthi uNicko ubabize ngezinkawu.
Akuyena uLimo kuphela othe uNicko akazange awasho amazwi acwasayo njengoba nabanye ofakazi oMnuz John Lekala, China Talane no-Abednigo Nzaka, bethe bamuzwa ecela usizo.
UNicko uthe kumphatha kabi ukuthi abamangali benze izinsolo ezinzima kangaka ngaye ngoba lokhu kulimaze isithunzi sakhe nesenkampani.
UKhomishana waseCCMA, uMnuz Vusi Makhanya, ulichithile icala labamangali, wathi abukho ubufakazi obuphathekayo obufakazela ukuthi uNicko wabacwasa.
Uthe kuyamangaza ukuthi abantu abangakaze babe nokungaboni ngaso linye noNicko, bathathe izinyathelo ezinqala kanjena kunokuthi bazame okunye.
UNkk Ezel van Niekerk ongumphathi wehhovisi lakwandabazabantu eTau Pele Construction, uthe ukuphuma kwalolu daba ngoMeyi, kwakhela inkampani yabo igama elibi.