Kufe abathathu kuhlaselwa othutha abafundi
USATHUKILE umndeni wowesilisa othutha izingane emuva kokuhlaselwa kwemoto abehamba ngayo wadutshulwa kwashona yena, umngani wakhe nomfundi kwaN eMlaza ngoLwesithathu.
Kuvela ukuthi uSiyabonga Nene (36) wakwaK eMlaza, osebenza njengomalume othutha izingane zesikole, ubehamba nomngani wakhe bebuya ukuyolanda izingane esikoleni ngoLwesithathu ntambama ngenkathi kuqhamuka abasolwa abangaziwa bavulela ngenhlamvu bebhekise emotweni yabo.
Kulesi sigameko kushone uNene, umngani wakhe nomunye umfundi obegibela imoto yakhe. Kuthiwa uNene ubehamba ngeVW Polo okuyimoto abeyisebenzisa njengoba sesisincane isibalo sezingane eziya esikoleni ngoba ezinye seziqedile ukubhala izivivinyo zekota yesithathu.
Umfowabo kaNene, uMnuz Siyanda Ngcongo, uthe akuzwile ngesigameko wukuthi emotweni bekukhona nomfundi wentombazane (9) okusolakala ukuthi ubesehlile emotweni ngenkathi edutshulwa ngoba isidumbu sakhe sitholwe sidindilize ngaphandle kwemoto ngesikhathi befika, kwathi esikaNene nesikamngani wakhe zatholakala ngaphakathi.
Uthe yize engenalo ulwazi lokuthi laba badutshulwe amahlandla amangaki kodwa
imoto abebehamba ngayo beyimbobombobo ngaphandle.
Uveze ukuthi uNene ubeneminyaka eminingi esebenza ‘njengomalume’ othutha izingane futhi ngokwazi kwakhe yiwona msebenzi abeziphilisa ngawo kanti ubuhamba kahle.
“Umfowethu ubewuthanda kakhulu lo msebenzi wokuthutha izingane futhi ubewenza ngokuzimisela ngoba ubenetekisi nemoto encane abekusebenzisa,” kuchaza uNgcongo.
Uthe okwamanje akekho owazi imbangela yokubulawa kukamfowabo futhi akekho umuntu abamsolayo ngoba kabamazeli sitha.
“Indlela okwenzeke ngayo sisola ukuthi abasolwa baqale ngokuqhumisa amathayi ukuze imoto ingeke ikwazi ukubaleka.
“Lesi sigameko sisithuse kakhulu siwumndeni ngendlela yokuthi asikakholwa namanje okwenzekile ngoba umfowethu ubezwana nawo wonke umuntu futhi ezithandela nezindawo zobumnandi,” kuchaza uNgcongo.
Uqhube wathi njengomndeni baphatheke kabhlungu futhi lesi sigameko siyisilonda esingasoze saphola ngoba sibazumile.
Imizamo yokuthola umndeni womfundi ayiphumelelanga
Okhulumela amaphoyisa KwaZulu-Natal, uConstable Thenjiswa Ngcobo, uthe kuvulwe amacala amathathu okubulala esiteshini samaphoyisa eMlaza.