Babheme bakholwa abesifazane ngezeluleko ngebhizinisi
UNGABAMBELELI ekutheni wena ufundeleni noma kungasakusebenzeli, vuleleka uzame eminye imikhakha ezokusebenzela.
Lokhu kushiwo ummeli uNkk Zama Mkosi ngesikhathi ekhuluma esithangamini esihlelelwe ukuthuthukisa amakhono ebhizinisi kwabesifazane esiyingxenye yombukiso wamabhizinisi esihlelwe wuMasipala weTheku, iDurban Business Fair, ebiseInternational Convention Centre (ICC), izolo.
UNkk Mkosi uthe uma ubona ukuthi umsebenzi owenzayo noma ibhizinsi olenzayo alisakuphilisi shintsha wenze okunye ngoba kuhlale kunelinye ithuba elikhona.
Uthe yena ubewummeli obhekele izinto ezithinta amaciko kodwa kuthe
uma kufika iCovid-19 washayeka ngoba amaciko abengasebenzi, waqala elinye ibhizinisi lokufundisa ngomthetho nge-internet.
" Ngathatha iselula ngizidlalela ngaqopha inkulumo ngafaka ezinkundleni zokuxhumana. Ngiqhubekile ngilokhu ngikwenza kwaba ngukuqala kwengxenye efundisa ngezomthetho," kusho yena.
UNkk Indrani Govender ongumsunguli wenkampani iRicniz Construction, obeluleka abesifazane kulesi sithangami, uthe ibhizinisi ungaliqala noma ngabe uneminyaka emingaki futhi libe yimpumelelo, uma uzimisele ukufunda uthole ulwazi.
"Ngiqale ibhizinisi ngineminyaka ewu-47, kunesikhathi lapho ngangihlekwa khona kuthiwa ngazini ngokwakha ngiwumuntu wesifazane.
“Akungiphathanga kabi lokho
ngoba ngempela nganginenalo ulwazi kunalokho kwanginika ugqozi lokuthi ngifunde okwangenza ngakhula emsebenzini wami.
“Ngigcine ngifaka uphiko lukagesi, olokunakekelwa kwezakhiwo, nolwezinsiza zokuxhumana," kusho uNkk Govender.
Uthe akusho ukuthi azikho izinselelo endleleni futhi ziningi kangangoba yena wafaka izicelo zomsebenzi ezingu-36 echithwa waze wathola umsebenzi esefaka okwesi-37.
U-Amanda Dlamini oke waba ngukapteni weBanyana Banyana, uthe kubalulekile ukuthi uma usemkhakheni ongena kuwo ngekhono lakho, ufunde ukuze ukwazi ukuthi uma sekufike isikhathi somhlalaphansi ukwazi ukuphila ngemfundo yakho.