Bakhala ngeBhange loMbuso elingenazwelo
INHLANGANO eyenza ucwaningo ngentengo yokudla nesimo senhlalo emphakathini, iPietermaritzburg Economic Justice & Dignity Group, kayeneme neze ngokunyuswa kwemalimboleko ngamanye amaphuzu angu-75 (basis points).
UMnuz Mervyn Abrahams obhekelele izinhlelo zale nhlangano, uthe iBhange loMbuso, iSouth African Reserve Bank (Sarb), alibacabangeli neze abampofu.
“Kuyaphoxa ukuthi iSarb ibuye yanyusa imalimboleko ngomunye u-75 basis points, ekubeni nasemhlanganweni wokugcina yayinyuse ngale mali. Abantu basaphefumula ngenxeba ngakho akufanele iSarb ilokhu inyusa imalimboleko uma ithi ifuna ukuhlenga umnotho. Angiqondi nokuthi kungani beyinyusile imalimboleko ngoba i-consumer price index, yehlile isuka ku-7.8% njengoba isiku7.6%?” kusho u-Abrahams.
Lokhu kuzokwenza kungangeni imali emnothweni bese kuholela ekuweni komnotho.
Uthe ukunyuka kwemalimboleko kuhlale kukubi ngoba kusho ukuthi abantu bazokhokha imali ethe xaxa ezikweletini zabo.
“Abantu bakuleli bathwele kanzima, abanye sebephila ngesikweletu ngenxa yokuthi amaholo awakwazi ukuqeda inyanga esekhona. Sebezokhokha imali ethe xaxa ezikweletwini zezindlu, ezikweletini zezimoto nakwezinye izimali abaziboleke emabhange. Ngeke basale nemali yokwenza ezinye izinto. I-Sarb ayibacabangeli nje abampofu, iyangicika ngalo mqondo walo,” kusho u-Abrahams.
Umphathi weSarb, uMnuz Lesetja Kganyago, uthe amalungu amathathu avotele ukuthi kunyuswe imalimboleko ngo75 basis points kanti amabili ebefuna inyuswe ngo-100 basis points.
Lokhu kusho ukuthi i-repo rate okuyimali ekhokhwa ngamabhange uma ebolekele kwiSarb isiwu-6.25% kanti i-prime lending rate okuyinzalo ekhokhiswa ngabantu uma beboleke imali emabhange isiwu9.75%.
UKganyago ukhale ngokuthi amandla emali awakabi sezingeni elikahle kanjalo nempi yeRussia ne-Ukraine, yenza kungabi bikho uzinzo emnothweni womhlaba.
Uthe ukunqamuka kukagesi kwenza ukuthi umnotho wakuleli ungakhuli kahle njengoba belindele ukuthi ukhule ngo-1.9% usuka ku-2%, akade bewulindele ekuqaleni.