Uhulumeni akalawule amaloli emgwaqweni
SIBHEKENE nesimo esinzima emadolobheni akhele isiFunda iZululand, lapho abantu bebulawa nsukuzonke ngamaloli athutha amalahle.
Lawa maloli asemaningi kangangokuthi asedlula ngisho amatekisi imbala.
NgoLwesihlanu olwedlule, iloli lamalahle libulale izingane zesikole eziningi, kwathi ngoLwesibili, kwashayisana amaloli amabili phakathi kweVryheid noLundi.
Imigwaqo yaseZululand, isiphenduke amathuna ngenxa yesibalo esikhulu nesivinini sala maloli. Yingakho umkhandlu waseZululand uphakamisa ukuthi okungcono awavale amaloli athutha amalahle, kusetshenziswe uloliwe.
Eminyakeni eminingi edlule, amalahle abethuthwa ngesitimela esisuka e-Ermelo sidlule eNewcastle, Vryheid nasoLundi, size siphelele eRichards Bay.
Ukuze kuhlengwe impilo abantu abafa nsuku zonke ngenxa yamaloli, kuwumqondo ophusile ukuthi amalahle athuthwe ngololiwe njengakuqala.
Kuwumthwalo kaNgqongqoshe wezokuThutha kuzwelonke, uMnuz Fikile Mbalula, ukuthi ahlanganise yonke imikhakha ethintekayo njengeSanral, Road Traffic Management Corporation, Santaco nabanikazi bamaloli ukuze siphume nekhambi elizophilisa isimo esibucayi esizithola siphansi kwaso eZululand.
Kubukeka sengathi uhulumeni wesifundazwe udonsa izinyawo ekusizeni umphakathi wakithi. Kuyishwa ngoba uhulumeni unamandla okulawula izikhathi amaloli engahamba ngaso.
Uma kuvunyelwana ngesibalo sawo kungakuhle ahambe ebusuku lapho abantu abaningi sebesemakhaya, bengekho emgwaqweni.
I-IFP inohlelo olucacile noluphephile lokulawula ukuhamba kwamaloli emigwaqweni.
Uma inganikwa igunya lokubusa, i-IFP ingaqinisekisa ukuthi;
* Yandisa isibalo samaphoyisa omgwaqo kuN2, phakathi kwePiet Retief noPhongolo.
* Ngamaloli athutha ukudla namanzi nophethroli kuphela ayovunyelwa emgwaqweni.
* Amaloli athutha amalahle ayokalelwa isibalo ukuthi angeqi esibalweni esithize ngosuku futhi anqunyelwe isikhathi sokuthi ahambe ebusuku kuphela.
* Kuvuselelwe uloliwe ukuze ube sesimeni sokuthutha amalahle, asuke emgwaqweni.
Sibone ongqongqoshe behla benyuka oPhongolo, benika ithemba sengathi kukhona abakwenzayo ukubhekana nesimo esibuhlungu esehlele imindeni yabagilwa bala maloli oPhongolo.
Siyazi ukuthi benzela ukubukwa emithonjeni yezindaba okuyothi nxa sekudlule imingcwabo, banyamalale njengesivinini sokufika kwabo.
Kithi esingabaholi abazalwe eZululand nesikhethwe ngabantu ukuthi sihole phambi kwabo, sinesibopho sokuqikelela ukuthi siyawakhipha lawa maloli emgwaqweni ukuze izingane nomphakathi jikelele, bakwazi ukusebenzisa imigwaqo ngaphandle kovalo lokuthi bazophelela emgwaqweni ngenxa yamaloli.
Mfundisi Thulasizwe Buthelezi
IMEYA YASEZULULAND