Uhulumeni uyasixhaphaza usiphuca ugesi namanzi
MHLELI: Ngithi angibhale kuleli lakho eliwela umfula ugcwele, ngizwakalise ukungenami kwami ngesenzo esibi esenziwa wuhulumeni mayelana nokunqanyulwa kokuphakwa kukagesi, osekuyinsakavukela muva nje.
Uhulumeni nenkampani ephakela ugesi, i-Eskom mabayeke ukusixhaphaza belokhu besiphuca ugesi, benze sengathi asiwukhokheli ekubeni sikhokha.
Indlela okuthathwa ngayo ugesi manje akuseyona ebikade yenzeka phambilini lapho bewuthathwa okungenani kanye ngosuku amahora amabili. Muva nje, abasanqeni ukuwuthatha izikhawu ezintathu osukwini.
Okusho ukuthi bawuthatha amahora ayisithupha ngosuku.
Mina bengithi okungenani abavele basiphuce wona nje unomphelo, sivele
sazi ukuthi sibuyela ekhandleleni kunalo masigcozi abasidlalisa wona.
Kufana nale nto eyenziwa wuMasipala iZululand kithi zakhamizi ikakhulukazi ezakhele uMasipala wasoLundi, yokuvala amanzi engatholakali empompini, baze bawavule ngoba sekuthanda bona.
Into eyenziwa wumasipala uyawavala amanzi empompini, awavule noma kanye ngenyanga.
Uma ubathinta ezingcingweni ukhuluma ngamanzi, bavele bekutshele ukuthi amanzi awekho kunesomiso, besho behubhuza, amanzi egcwele imifula naseMfolozi.
Eyezimoto zikamasipala eziphakela amanzi angiyiphathi-ke, ungafa yizo azisaziwa. Usuyibona ngoba kade iyofakela abathize abaziwayo noma iyofakela lowo osuke esekhulume nabo ngenhloso yokuwathenga. Angiyiphathi-ke eyezindawo
ezisehlanzeni ezingenampompi. Imoto yamanzi isafike kanye noma kabili yilokhu kwavotwa ukhetho lohulumeni basekhaya ngonyaka odlule. Sekwaphilwa ngamanzi ambiwa phansi nawasemifuleni.
Ngoba phela kwabona ompompi laba ababefakwe emakhaya eminyakeni eyedlule sebaze balala ubulwembu, lutho ukuphuma amanzi futhi akekho okhuluma indaba yabo ngisho kulaba abazibiza ngabaholi emphakathini. Bathule sengathi bamumethe isinemfu.
Akungadlalwa ngathi nangemizwa yethu. Kuyilungelo lethu siyizakhamizi zaseNingizimu Afrika ukuthola intuthuko esifanele nesezingeni.
Lindokuhle Basi EMAHLABATHINI