UMatsheke usafuna ukuyodla ijezi kwiChiefs
UMDLALI wasesiswini, uDarrel Matsheke, obolekiswe yiKaizer Chiefs kwiSwallows, uyasibona isikhala sakhe esikimini somqeqeshi u-Arthur Zwane eNaturena.
UMatsheke (23) wayeyibamba eqenjini laMakhosi leDStv Diski Challenge kumasizini adlule ngaphansi kukaZwane. Bekunethemba lokuthi ukunikwa isikhundla sokupheka isikimu esikhulu kukaZwane kuzoholela ekutheni ahlale eNaturena, uMatsheke obekade ebolekiswe kuThongathi FC, kwiMotsepe Foundation Championship ngesizini edlule.
Amakhosi adedele abadlali abangu-12, asayinisa abanye ngaphambi kokuqala kwesizini ka-2022/2023. KwiSwallows, uMatsheke ubolekiswe noLebohang Lesako okhulele enkulisa yeChiefs.
"Ngifuna ukubuyela kwiChiefs ngiyolwela indawo yami. Ikhona indawo yami laphaya. Ngifuna ukwenza isiqiniseko sokuthi ngisebenza kanzima lapha kwiSwallows ukuze ngizophindela ngiyodlala kwiChiefs," kusho uMatsheke.
Ngesikhathi somqeqeshi uGavin
Hunt eNaturena, uMatsheke ngomunye wabadlali abalimisile iqembu. Ngaleso sikhathi, iChiefs kade idonsa isigwebo ebesiyivimbela ukuthi isayinise abadlali kulandela izinkinga ezivele ngemuva kokusayinisa ngendlela okungesiyona, u-Andriamirado Andrianamimanana waseMadagascar.
Inkontileka kaMatsheke neChiefs izophela ngoJuni 2024. Lokhu kusho ukuthi le sizini ka-2022/2023, kufanele ayisebenzisele ukugculisa iChiefs.
Endaweni kaMatsheke enkabeni yenkundla, iChiefs isayinise uYusuf Maart obedlalela iSekhukhune United, George Matlou obekwiSwallows noSiyethemba Sithebe obekuMaZulu.
"Ngicabanga ukuthi ekupheleni kwesizini, ngizobe sengisesimeni esihle sokuyobanga ijezi kwiChiefs ngoba manje sengidlala kwiDStv Premiership. Kuzobonakala ukuthi kuhamba kanjani. Izinto azenzeki ngendlela efanayo kwiMotsepe Foundation Championship nakwiDStv Premiership. IMotsepe inezinselelo eziningi uma uyiqhathanisa nePremiership kodwa ke izinga lalapha liphezulu. Kusetshenzwa kakhulu lapha futhi amaqhinga omqeqeshi kufanele uhlale usebenza ngawo," kusho uMatsheke.
UMatsheke ubekade eseqenjini leZinyoni elixetshulwe ngo-4-0 yiLamontville Golden Arrows koweligi, eThekwini, ngempelasonto edlule.
"Umdlalo besiwuphethe. Emizuzwini engu-10 kuya kwengu-15 yokuqala, iqhinga lomqeqeshi (Dylan Kerr) kade lisisebenzela. Ngokuqhubeka komdlalo, siyeke ukugxilisa imiqondo yethu okuyinto esibulele nasemidlalweni eyedlule. Sangenelwa ngamagoli ngenxa yamaphutha ethu. Amaqembu esidlala nawo awakujulukeli ukushaya amagoli kithina," kusho uMatsheke.
UKerr uxoshiwe ngoLwesithathu eqenjini ngemuva kokuba nomhlangano nabaphathi olandele lo mphumela abawuthole kwi-Arrows.
Kuyiwa ekhefini leFifa lamasonto amabili, iSwallows ibambe indawo ka-14 kwi-log ngamaphuzu ayisishiyagalombili emidlalweni elinganayo. Uma kubuywa izoqhuthana neChiefs ePeter Mokaba Stadium
ngo-Okthoba 5.