Omakoti beMotsepe bafuna ukungena begijima kwiPSL
USIHLALO weDrakensberg FC, uMpendulo Dladla, akumethusi ukuba ngomakoti kwi-ABC Motsepe League njengoba ebona kungekho okungabavimba ekubeni sohlwini lwamaqembu alwela isicoco seligi.
Igama laleli qembu eliteketiswa ngokuthi Amanqe, lisematheni kwabalandela lesi sigaba.
Emdlaweni wokuqala wokuhlungela ukungena kwi-Last 32 yeNedbank Cup, baqumbe Umvoti. NgoLwesibili kuma-quarterfinal babhaxabule iNjampela ngo-3-1.
Kusasa iDrankensburg ecijwa uSdanono "Sdoks" Khumalo ngokusizwa uSiyabonga Magubane, izobhekana noMkhambathini kowandulela owamanqamu, ngo-9 ekuseni, eNgcedomhlophe, eMandeni.
Komunye, iMilford izodlala neGWP Friends ngo-11. Owamanqamu ungo-3 ntambama ngosuku olufanayo.
Iqembu elizonqoba lizodlala neliwaqwaqwade wonke emakhanda kwiSAB League ukuze kuphume iqembu elizomela isigaba seSafa KwaZulu-Natal kwazodlala kwi-Last 32 yeNedbank Cup.
“Ngiyazi ukuthi njengoba sifika kwiMotsepe abanye bazothi ngiyagagamela. Cha akunjalo, ngisho lokhu ngenxa yokuqina kweqembu esinalo nengendlela esidlala ngayo.
“Impela sifuna ekupheleni kwesizini kube yithi esimela iKwaZulu-Natal emidlalweni yokuhlungela ukunyukela kwiMotsepe Foundation Championship,” kusho uDladla.
“Izimbangi zethu sesizicacisele ngezifiso zethu ngeNedbank. NangoMgqibelo kuMkhambathini sizoqhubeka nokukufaka emakhanda ezimbangi zethu ukuthi asizele ukuzodlala izindlu. Kungaba umlando kubantu bakithi ezintabeni zoKhahlamba ukuba neqembu lokuqala ukudlala kwiLast 32 Nebank Cup nakwiPSL."
Leli qembu lasesifundeni Uthukela, libe ngompetha kumaKZN SAB Play Offs abeseMtubatuba. Linyuselwe kwiMotsele noMtuba All Stars eliwushaye kowamanqamu.
UDladla uthe yisizini yesithathu le Amanqe awasungula.
"Kwisizini yokuqala sisunguliwe saphuma kowamanqamu kumaKZN SAB Play Offs.
Ngesizini ka-2021/22 senze isiqiniseko sokuthi siyangena kwiMotsepe. Siyazi kuzoba nzima kodwa ngikholelwa ekutheni nakuMotsepe singazenza izimanga.“
Kubadlali abanesipiliyoni, iDrakensberg ishaya ngoDiyo Sibisi owazakhela igama emaqenjini okubalwa kuwo iMamelodi Sundowns. UDladla uthe iningi ngabafana abasebancane, abasalambele impumelelo.