UBroos uvuma eyokushoda ngoZwane kwiBafana
IZITHENJWA zeMamelodi Sundowns, uThemba “Mshishi” Zwane nonozinti uRonwen Williams, zizifake ngezenzo, zazinza enhliziyweni yomqeqeshi weBafana Bafana, uHugo Broos, obengawuvali umlomo ngazo kulandela ukunqoba kwaleli qembu lesizwe kwiSierra Leone ngoMgqibelo, eGoli.
IBafana ibuyise injabulo ezweni ngesikhathi ibhubhudla iSierra Leone ngo-4-0 wamagoli amabili kaZwane (amabili), Aubrey Modiba nelikaMihlali Mayambela kowobungani odlalelwe e-FNB Stadium.
Ngemuva kwalo mdlalo, uBroos obekhuluma esithangamini nabezindaba, uzwakalise enkulu injabulo ngendlela uZwane adlale ngayo emdlalweni wokuqala embuyisile kwiBafana. Ubuye wabalula nesenzo sikaWilliams esimshiye ehlabeke umxhwele futhi ekholwa nakakhulu ukuthi lokhu azama ukukuhlanganisa kuzokwenzeka.
UZwane ubeqhakaze njengesibani kulo mdlalo njengoba engagcinanga ngokushaya amagoli amabili kepha wakhele noMayambela elakhe.
Indaba kaZwane nokuzitshwa uBroos ikhulunywe kakhulu ngaphambi kwalo mdlalo kepha ngemuva kwawo, lo mqeqeshi waseBelgium, uvule inhliziyo ngenjabulo yakhe ngesinqumo sokujika umqondo ngale njini yeSundowns.
“Angiyena umqeqeshi okhonze ukuqhakambisa abadlali ngabodwana kodwa okwenziwe uZwane namuhla (ngoMgqibelo) kungishaye ngaphakathi, ngaqonda nokuthi mhlawumbe uyena umdlali ebesishoda ngaye sonke lesi sikhathi,” kusho uBroos.
“UZwane uyakwazi ukugcina ibhola. Ungumpetha wokuliphasa kanti uneso lokushaya amagoli ngakho-ke kungenzeka ukuthi kuthathe isikhathi ukuthi simlande ngenxa yezinkolelo zami njengoba kwaziwa ukuthi ngikholelwa kubafana abancane isikhathi esiningi,” kuqhuba uBroos ngalo mdlali.
“Ngijabule kakhulu ngoba ezinyangeni ezimbalwa bengingayizwa indaba kaZwane kodwa kuthe uma ngijika umqondo, wangivezela ukuthi uyilokhu ebesishoda ngakho.
“Ngizishaya isifuba ngesinqumo sami kodwa okumnandi kakhulu ukuthi naye uZwane ukhombise izwe lonke ngendlela adlale ngayo, ukuthi bekufanele ngiwujike umqondo ngaye,” kusho lo mqeqeshi.
UBroos uphinde waqhakambisa nesenzo zikaWilliams ozicelele ukukhishwa esiwombeni sesibili ngenhloso yokuzwisa, uMelusi Buthelezi, ukudlala esigabeni samazwe ngamazwe.
Lesi senzo sikaWilliams siphinde samqinisisa idolo lo mqeqeshi ngokusho kwakhe ukuthi kukhona lapho eya khona naleli qembu lesizwe.
“Kusemqoka ukuthi ngikusho lokhu. Sekusele imizuzu eyishumi ukuthi umdlalo uphele sihamba phambili ngo-4-0, ukaputeni weBafana ungazise ukuthi ngingamkhipha uma ngithanda ukuze kuzovuleka ithuba kuButhelezi.
“Lokhu kukhombisa ngokusobala ukusondelana kwabadlali okuyinto emqoka kimina ngaphambi kwemidlalo ebalulekile yokuhlungela i-Afcon ngonyaka ozayo,” kusho uBroos.
IBafana imelwe ukushaya iLiberia kweyokuhlunga ngonyaka ozayo ngemuva kokuqala kabi ihlulwa iMorocco ngo-2-1.