OweJDR umincele ukubuyela enkundleni ngokushesha
UMDLALI weJDR Stars, uNkosingiphile Mntambo, akazimsele ngokuphuthwa imidlalo eminingi yaleli qembu njengoba ethandazela ukuthi kubuywe ekhefini leFifa eseluleme.
UMntambo ushayeke kabi ekhanda emdlalweni wabo wokugcina bebhekene neCasric Stars kwiMotsepe Foundation Championship.
Lo mdlali oyibamba emuva kwesokudla, emizuzwini eyisikhombisa kuqale umdlalo wezakhe nomakoti beMotsepe Foundation Championship, iCasric, ube nebhadi washayisana ngekhanda nabemakene naye.
Nokho ukwazile ukuwuqeda lo mdlalo ophele zibambene ngeqanda.
Utshele Isolezwe ukuthi ngemuva kwawo, uthungiwe ngenxa yokuvuleka kakhulu kwenxeba. Uveze ukuthi ngobusuku balelo langa akalalanga izinhlungu.
Ekuseni unikele kudokotela omtshele ukuthi ushayeke kabuhlungu, usazohlala amasonto engadlali.
"Yibhadi leli, kungathi kuvulwa isizini ngivele ngilimale kanje. Nokho-ke impilo yasebholeni injalo. Ngihlalele ethembeni lokuthi lizophela (ikhefu) sengiluleme," kubeka uMntambo ozalelwe, eMabheleni.
UMntambo ube ngomunye wabadlali abalime indima iJDR Stars ilala indawo yesine ngesizini edlule ebonakala emidlaleni ewu-20 yayo.
Uveze ukuthi okubalimazile ngesizini edlule ukulahla umgqigqo emidlalweni yokugcina.
Ngesizini ka-2021/22, iJDR beyithishwa namanye amaqembu azonyukela kwiDStv Premiership. Ike yahlala isikhathi eside esicongweni.
"Kule sizini esikuyona ubuholi beqembu buthe abudingi maphutha, iqembu balifuna esigabeni esiphezulu ngesizini ezayo. Ngikubona lokho kwenzeka, sineqembu eliqinile. Yebo, sivule kabi kodwa sesingenile emgqigqweni wethu wokunqoba.“
Kuyiwe ekhefini iJDR ibambe indawo yesithupha ngamaphuzu ayisikhombisa emidlalweni emine.
Esicongweni kule ligi kuhleli iTshakhuma ngamaphuzu ayisishiyagalolunye. Ilandelwa iHungry Lions ngamaphuzu alinganayo. Kweyesithathu kukhona i-University of Pretoria ngamaphuzu ayisishiyagalombili.
Uma sekubuya imidlalo iJDR izokwamukela amaTuks eGiant Stadium ngoMgqibelo ngo-3.30 ntambama.