Imibhikisho kubhaliselwa ukuvota
INCOME abantu bakuleli ikhomishini yezokhetho i-independent Electoral Commission (IEC), abaphume ngobuningi babo bayobhalisela ukuvota ngempelasonto.
Ikhomishini izolo imemezele ukuthi bangaphezu kwesigidi abantu abaphume ngobuningi, beyobhalisela ukuvota okhethweni lwangonyaka ozayo.
Okhulumela ikhomishini, unksz Kate Bapela, uthe bajabule ngokuthi bangaphezu kwesigidi abantu abaphumile beyobhalisela ukuvota.
Uthe osukwini lokuqala babe ngaphezu kwesigidi abaphumile, wathi izolo emini bangu-609 447 abese bebhalisile.
“Bangaphezu kuka-100 000 ababhalise online ngosuku lokuqala. Kuyasijabulisa lokhu ngoba kube umlando ukuthi kubhalise abantu abangaka.”
Uthe izolo emini bangu-40
000 abese bebhalise besebenzisa uhlelo lwe-online.
“Sincoma abantu bakuleli abaphumile bayobhalisa. Abanye bebeyobheka imininingwane yabo kanti sinxusa nalabo abangakayi ukuthi baqhubeke online babhalise.”
Unkk Ntombifuthi Masinga isikhulu sekhomishini Kwazulunatal, uthe osukwini lokuqala lokubhalisa ngomgqibelo, bangaphezu kuka-200 000 ababhalisile.
Uthe u-38 000 wabo bebeqala ukuzobhalisa wathi abantu abasha abebevele bebafuna ukuthi babe sohlwini lokubhalisa.
“Kuqale ngobuhixihixi kwezinye iziteshi njengoba kukhona abamashile bekhala ngezidingo. La mamashi abenzeka komasipala impendle, Kokstad, Mkhambathini, Msinga nakwadukuza.”
Uthe kumasipala ihowick ku-ward 9, kuwe itende abebelisebenzisa ngenxa yemvula ebihambisana nomoya.
“Emkhambathini ku-ward 6, kube nenkinga yokuthi umfula bekungaweleki kodwa sigcine sikwazile ukuvula sabasiza abebezobhalisa.
Sike saba nezinkinga nje emtshezi namhlanje, abantu bebemasha kodwa amaphoyisa angenelela.”
Uthe emsinga bekufakwe ingidi kwesinye seziteshi kodwa bakwazile ukusebenza besizwa amaphoyisa.
“Ejozini ku-ward 15, obesiza ukuletha izinsiza zokuvota ube nenkinga yemoto kodwa ugcine ethole usizo. Bangaphezu kuka-105 000 abaphumile izolo, abangu-19 000 abaqalayo ukubhalisela ukuvota.”
Abaholi bamaqembu ehlukene baphume ngothi lwabo bavakashela kwezinye zezikhungo obekubhaliselwa ukuvota kuzona.
Abanye babo kubalwa umengameli Cyril Ramaphosa, umholi WE-EFF umnuz Julius Malema, owe-ifp umnuz Velenkosini Hlabisa nowe-da umnuz John Steenhuisen.
Umholi we-da esifundazweni, umnuz Francois Rodgers, uthe kuhambe kahle ezikhungweni abezihambele kulezi zinsuku ezimbili zokubhalisa.