Ungqongqoshe ubalise ngokufa kwemishini kubuya ukucinywa kukagesi
UNGQONGQOSHE wezikagesi, udkt Kgosientsho Ramokgopa, uthi izinhlelo zokunqamuka kukagesi zibuyele emuva ngenxa yokufa kwemishinii eminingi eziteshini zikagesi ezehlukene.
Izolo, uramokgopa utshele abezindaba ukuthi izwe libuyele esigabeni sesithathu sokunqamuka kukagesi ngenxa yokuthi emasontweni amabili edlule kufe imishini ephehla ugesi emaduvha, Hendrina, Kriel, Kendal, Medupi nasecamden.
“Ukufa kwemishini amasonto elandelana kusho ukuthi kunogesi ebesihlele ukuthi uzoba khona, ongasekho. Lokhu kwenza ukuthi sisebenzise udizili obhekelele izimo eziphuthumayo ukuze kube nogesi ezweni. Siyalungisa imishini yethu futhi sesiyazazi izinkinga,” kusho uramokgopa.
Uthe bayakuhlela ukulungisa imishini kagesi ukuze ingafi bengalindele kodwa eminye ivele ibaphoxe yize imisha njengeyasemedupi.
Wehlise amaphaphu kubantu baseningizimu Afrika ngokuthi kuleli sonto, ulindele kubuye imishini emihlanu kagesi esemaduvha, Majuba naselethabo.
“Akusikona ukuthi asenzi lutho kodwa simatasa nomsebenzi wokulungisa imishini yethu nokuletha izinhlobo ezehlukene zikagesi. Ngiyajabula ukutshela abantu ukuthi umshini wethu ophehla ugesi ngenuzi osekoeberg, usuyasebenza. Uqale ukusebenza ngomgqibelo futhi sikwazile ukulula isikhathi sokusebenza kwawo ngeminyaka ewu-20,” kusho uramokgopa.
Uveze ukuthi bekufanele ulunge ngojuni lo mshini kodwa ngenxa yezingqinamba ezithile uze walunga manje, nakho lokhu bekunciphisa ugesi okhona ezweni.
Uthembise abantu bakuleli ukuthi bazosebenzisa imali abayinikwe ngamazwe aphesheya ukuletha ugesi ohlanzekile.
Uthe zicacile izinhlelo zokusebenza kwale mali futhi zizohlomulisa osomabhizinisi nabantu abajwayelekile, abaziphehlela ugesi emakhaya.