Abayizwa eyokumiswa kwamaloli erichards Bay
ABANEME abamaloli ngesinqumo sezikhulu zechweba laserichards Bay, sokuvala amaloli aletha impahla kuleli chweba.
Ngokusho kwesikhulu esiphezulu senhlangano yabamaloli, iroad Freight Association, umnuz Gavin Kelly, izikhulu zaserichards Bay, zithe ngeke zisayamukela impahla elethwa ngamaloli kuleli chweba.
“Bathi bathathe lesi sinqumo kulandela ukwanda kakhulu kwesibalo samaloli aletha impahla echwebeni. Babalule ukuthi ukumiswa kwamaloli ashiya impahla echwebeni kwenzelwa ukuphephisa abanye abasebenzisa imigwaqo yaserichards Bay. Asihambisani nalesi sinqumo,” kusho ukelly.
Uthe amaloli awanalo icala kodwa itransnet kolunye uhlangothi iyona eyenza ukuthi kugcwale amaloli emgwaqweni.
Ubalule ukuthi iyona ebigoqe izandla kumosheka imizila ehamba amaguzu.
Uveze ukuthi itransnet echwebeni laserichards Bay iyahluleka wukuhlela kahle umsebenzi ngoba ukube amaloli anendawo yokulinda ngaphambi kokuthi angene echwebeni ngabe awami emgwaqweni.
“Asiphusile isinqumo setransnet Port Terminals ngoba uma amaloli engawuhambisi umkhiqizo wezimayini echwebeni laserichards Bay, kusho ukuthi kumele abheke amanye amachweba. Lokhu kusho ukuthi kukhona ozolahlekelwa yimali. Kuyaziwa ukuthi njengamanje izinkampani sezithutha impahla ngamaloli. Uma kumiswa amaloli kusho ukuthi kungalahleka imisebenzi. Kufanele sibuyekezwe lesi sinqumo,” kusho ukelly.
Esitatimendeni esithunyelelwe abezindaba aberichards Bay Transnet Port Terminals, bathe kungenzeka ukuthi bakumise ukulethwa kwempahla ngamaloli angekho ohlwini echwebeni labo.
Bathe ngamaloli osekucacile ukuthi isifikile impahla yawo azolekelelwa.
Kulindeleke ukuthi kube nomhlangano ophuthumayo namakhasimende aleli chweba nazo zonke izinhlaka ezithintekayo ukuze kubhungwe ngezinhlelo ezintsha.
Umnuz Siphesihle Muthwa wenational Truck Drivers Foundation, uthe akukho abatshelwe khona ngokumiswa kwamaloli echwebeni laserichards Bay kodwa bezwa ngabezindaba.
Ubalule ukuthi akulula ukumisa amaloli kuleliya chweba ngoba imikhiqizo yezimayini kufanele iye emikhunjini bese iyodayiswa phesheya ngakho uma kumiswa amaloli kuyosho ukuwa komnotho.